Tuesday, August 20

‘Melenti buluh berengkah ari tubu’: Dr Annuar

0

PENAPATKA: Dr Annuar (tiga ari kanan) seraya dikemataka bala bukai nyuaka setipikit ngagai seiku ari nembiak maya Pengerami Konvensyen Tabika/Tadika KEMAS P.212 Parlimen Sibu ba sebengkah hotel tebilang di Sibu, kemari.

Pra-sekula tau bendar mantu anak mit ngulihka pengelandik sereta peneleba ba pelajar

SIBU: Bala apai indai ditangkan ngambika nyukung pengawa perintah nengah Opis Pemansang Mensia Mayuh (KEMAS) nganjung anak sida besekula berengkah ari umur biak.

Kaban Kunsil Nengeri (ADUN) Nangka Dr Annuar Rapaee madah, sistem pelajar ba menua tu berengkah ari pra-sekula dikena nyediaka anak mit nampung pelajar sida ngagai sekula primari.

“Apai indai patut nyukung pengawa perintah numbuhka KEMAS enggau chara nganjung anak ngagai pra-sekula lebuh umur anak udah chukup.

“Kitai enggai anak Bumiputera tinggal ari anak bansa bukai taja pan semina ba pra-sekula laban ba tikas tu sida diajar enggau penemu keterubah sebedau ditampung ngagai sekula primari,” pia ku iya madah.

Iya mantaika jaku nya maya ngulu Pengerami Konvensyen Tabika/Tadika KEMAS P.212 Parlimen Sibu ba sebengkah hotel tebilang ditu.

Ba pengerami nya 276 iku nembiak mit ari 54 buah tabika KEMAS bagi Parlimen Sibu nerima setipikit ari Dr Annuar.

Dr Annuar madah, bala anak ke enda dianjung ngagai pra-sekula deka tinggal ari nembiak bukai maya sida udah tama sekula primari nyengkaum apin nemu macha, nulis enggau ngira.

Pekara tu ku iya tau ngujungka penanggul bukai baka anak deka berasai malu laban nembiak bukai udah jauh nemu macha, ngulis enggau ngira ti tau nekul pelajar sida.

“Ukai semina nya aja, bala pengajar mega deka ngasaika pekara tu kelimpah nembiak nya mega mengkang deka tinggal ari pelajar enti dibanding enggau nembiak ke udah kala belajar ba pra-sekula,” pia ku iya nambahka baru.

Dr Annuar mega madah, nengah KEMAS, ulah deka begulai enggau pangan diri tauka beserakup ulih ditempa ba renggat umur ke biak.

“Ari tu, pengelikun ke diasai kitai rayat sehari tu ulih dikenegapka agi nyentuk ke jemah bepun ari penyerakup ke udah ditempa ari umur biak baka nengah KEMAS tu.

Maya tu mega, iya berasai temegah ati laban KEMAS bagi parlimen Sibu ransing mantu bejadika juluk ati perintah ti deka nempa modal mensia ti beguna bepun ari pra-sekula.

Pengerami sehari nya mega digulu pengari Direktor KEMAS Sarawak Shuib Ahmad, Pemesai KEMAS Sibu Leena Tero, Penyelia Kanan KEMAS Parlimen Sibu Abang Muhammad Abang Jess enggau Penyelia Kanan Kemas Parlimen Labang Fricsilla Bangi Mujap.