PENGGI NUAN: Salang nerima tepa ari TR Rimau maya penemu-
ai ngagai rumah panjai nya di Ulu Nansang, Hari Enam tu tadi.
PAKAN: Perintah udah ngatur pelin dikena numbuhka mayuh agi projek pemansang ke tau ngangkatka pengidup peranak menua pesisir ba nengeri tu kandang tujuh taun ti deka datai.
Penyanding Penemu Opis Kaunsil 1Malaysia Sarawak Datuk Joseph Salang Gandum madah, projek nya ngemeratka pekara penatai pemisi rayat seraya deka ngembing rayat ngasaika pengidup ti meenyana.
“Tu sebengkah ari pekara ke diatur kitai nyediaka rayat di menua tu bepenatai pemisi tinggi manggai ba taun 2020 nyin ila,” ku iya maya pengerami pemesai begulai enggau rayat di Rumah Rimau Jugol, Ulu Nansang, lemai Hari Enam tu tadi.
Berindik ari pengeransing perintah tu, ku Salang, bala raban tuai rumah patut chakah agi nyengkaum meri penerang enggau nyemetak bekaul enggau projek pemansang perintah ngagai peranak rumah panjai baka projek nanam sawit, getah enggau lada.
“Kelimpah ari nya, bala tuai rumah patut bekempit enggau Opis Betanam Betupi tauka pemesai opis perintah ke bukai ngambika muntang tetitihka pelin pemansang perintah kemaya hari tu.
“Ari nya, kita mega tau betanya senentang projek pemansang ke deka dikemansangka di menua diri kelimpah ari ngaga peminta ngemansangka tanah temuda,” ku iya nandu.
Salang ti mega Kaban Parlimen Julau madah, iya nangi bendar rayat ba menua pesisir bisi enda ampit tauka tinggal ari projek pemansang ke diatur perintah nya.
“Kami pengari rayat ulih mantu kita bela ngasaika projek tu baka nganjung peminta kita ngagai opis ti bekaul.
“Ambika banding baka projek nanam getah. Aku deka bebendar ngiga chara mantu sida ke deka nanam getah tang tanah enggi sida enda besai. Kitai nyangka ulih mantu sida tu nambahka agi pemesai tanah sida dikena nanam getah,” tandu iya.
Berebak enggau tu mega, Salang meri besai terima kasih ngagai rayat tunga ke Babai enggau Nunggang laban nyukung iya maya ba pengawa bepilih besai tu tadi.
“Tang taja pan baka nya, aku ngarapka sida ti ngundi penyakal ba pengawa bepilih tu tadi, ulih meratika baru nama pengurang ari pemutus ke digaga sida.
“Barisan Nasional (BN) semampai nyadi perintah menua kitai. Iya mega perintah kitai ke diatu.
“Sida ke nyukung BN anang nangi ari ke ditinggal ngasaika projek pemansang nyengkaum baka geran projek mit menua pesisir,” ku iya madah.
Dulu ari nya, pemesai Opis Betanam Betupi Julau, Emerk Uyoh madahka perintah bisi langgur deka bejalaika atur pemansang ba 4,900 hektar pemesai tanah endur nanam getah ungkup sitak Sarikei taun ti deka datai.
Penyampau tu ku iya sebagi ari 550,000 hektar pemesai tanah ke deka dikemansang ba serata nengeri manggai taun 2020.
“RISDA deka nyaup nanam 10,000 hektar getah ninting taun.
“Mensia mayuh mega tau datai ngelawa opis kami ngaga peminta ngambi bagi ba projek tu lalu betanya enggau silik senentang projek tu,” ku iya.