SRI AMAN: Semua ketuai raban bansa lebih agi tuai rumah di pelilih mit menua tu dipinta meransang nembiak redak sida terus nyukung perintah, ku Menteri Muda Pemansang Menua Pesisir enggau Pengawa Berumah Sarawak, Datuk Francis Harden Hollis.
Ku iya, ketuai raban bansa lebih agi bala tuai rumah patut bejalaika tanggungpengawa meransang nembiak redak nyukung perintah, ukai ngerachun runding sida ngambi begedi ke perintah.
“Kita ke nyadi tuai rumah, orang ke pemadu semak enggau nembiak redak ba menua diri, nya alai kita anang ngerachun runding sida ngambi begedi ke perintah tang meransang sida majak nyukung perintah.
Iya ke mega Kaban Kunsil Nengeri (ADUN) Simanggang bejaku munyi tu lebuh bejadika Penumbuh Taun Ke-4 Komiti Pemansang enggau Pengelikun Genturung Pendiau (JKKK), Taman Bayu ‘B’ beserak enggau Pengawa Bejadika Biro Indu JKKK nya ba sebengkah restoren ditu malam ensanus.
Ku iya, udah lama BN tumbuh di menua Malaysia lalu mayuh mega pemansang ke udah dipeda kitai. Semua pemansang nya ari perintah Barisan Nasional (BN).
“Nya alai, nadai kebuah rayat ngenggaika pemansang ari perintah BN ke udah mujur ngemansangka menua tu ti betuaika Menteri, Dato Sri Mohd Najib Tun Razak ba perintah besai lalu Pehin Sri Taib Mahmud di Sarawak.
“Barang sapa ke kala nyukung penyakal sebedau tu, patut ngempitka diri enggau perintah laban semina perintah BN aja ke manah sereta seruranngemeratka rayat,” ku iya.
Ku Francis, semua pemansang baka jalai alun, karan, ai beresi enggau utai bukai endang ari perintah BN, ukai ari penyakal.
Ukai semina nya aja, ku iya mayuh tanah ba kandang menua Sri Aman udah dikemansang nyengkaum sekim endur nanam sawit, getah enggau utai bukai.
“Nengah projek ngemansangka tanah nya, kami nemu nya deka meri penguntung ngagai mensia mayuh di menua pesisir ari segi nyungkak tikas penatai pemisi sida,” ku iya.
Sama bisi ngulu pengerami nya, Kaban Kunsil Nengeri (ADUN) Engkilili, Dr. Johnical Rayong Ngipa, Tuai Opis Kaunsil Pelilih Mit Sri Aman (MDSA), Kaunsilor Sawing Sumar, Chairman JKKK, Eddie Libau, Chairperson Biro Indu, Sedara Rabong, Ketuai Nembiak Parti Sa’ati Rakyat Sarawak (SUPP) N.27 Simanggang, Patrick Micheal Dian enggau bala kaban JKKK ke bukai.
Beserimbai enggau pengerami nya, Francis ngungkupka belanja RM 3,000 lalu Masir meri RM 3,000 enggau RM 2,000 ngagai JKKK sereta Biro Indu JKKK, Dr Johnical Rayong mega sama bisi ngungkupka RM 2,000.