Anjung peminta enggau lengkas

0

IDRES ADAM

Ngelalau veteran soldadu ti deka meli rumah ungkus murah di Sibu Jaya
SIBU: Gerempung Veteran Soldadu Malaysia Nengeri Sarawak (PVTMS) nesau bala kaban gerempung ti deka meli rumah di Sibu Jaya ke diungkup perintah ngagai veteran soldadu nganjung surat peminta ngagai opis gerempung enggau lengkas.

Mandal Presiden PVTMS Idres Adam madah, taja pan baka nya naka ke diatu semina 25 buah rumah aja ke beungkus entara RM46,000 ngagai RM70,000 di Sibu Jaya diungkup ngagai veteran soldadu.

“Enti nundaka penyampau tu enda chukup lalu gerempung kitai deka ngiga chara minta perintah meratika pekara tu.

“Kitai ngarapka bala kaban gerempung ti ulih meli rumah tu nganjung peminta ngagai opis enggau lengkas,” ku iya maya ngarika Presiden PVTMS Thomas Ling ba aum pengarang berita ditu, kemari.

Idres madah, sepengudah pinchin gawa mayuh veteran soldadu mulai ke diri ke menua lalu bisi mega diau begulai enggau bala kaban belayan, menyadi, apai indai tauka nyuwa.

“Bisi mega lalu empai bisi rumah ke diri empu. Nya alai, sida ke udah ngerijister nyadi kaban gerempung anang muai awak ke diberi perintah tu,” ku iya.

Iya mega madah, gerempung tu ngandalka perintah ulih numbuhka mayuh agi rumah ungkus mit lalu jauh mudah ari rega ke bendar dikena mantu raban tu ngasaika pengidup ti lantang agi.

“Tu chara dikena masa pengawa veteran soldadu suba ti berambunka nyawa ngelaban munsuh semina ketegal deka ngulihka pengelikun menua baka ke diasai kitai sehari tu.

“Bantu ari perintah baka tu engkeman bendar dikena malas budi raban veteran soldadu dulu suba,” ku iya madahka baru.

Berebak enggau tu mega, Idres madah, PVTMS ke diatu bisi lebih 1,500 iku kaban lalu ba Sibu aja lebih 400 iku.

Bala kaban PVTMS ti ulih meli rumah tu tau nganjung surat ngagai No. 43-45, Tingkat 3, Jalan Tuanku Osman, Peti Surat 967, 96008 Sibu, Sarawak tauka betelefon ngagai lumur 084-349755 tauka 084-341935.

Maya bejadika Kimpin Tabung Hari Bujang Berani 2013 Gerempung Ex-Soldadu Malaysia Nengeri Sarawak ba Padang Merdeka kena 2 November tu tadi, Menteri Pengawa Berumah Datuk Amar Abang Johari Tung Abang Openg madahka perintah udah ngungkupka 25 buah rumah di Sibu Jaya ngagai veteran soldadu.

Kelimpah ari nya, projek ke sebaka mega benung diperunding deka digaga ba pelilih Kapit bepun ari bala ex-soldadu agi mayuh diau natam ba sitak nya.

Projek tu mega bela diungkup ngagai ex-polis.