Sunday, January 19

Gaya politik menua pesisir bebida bepun ari penau bansa Dayak ba pekara tanah NCR

0

KOTA SAMARAHAN: Menua pesisir di Sarawak dijangka napi gaya politik ke bebida enggau kelia, ke alai peranak menua pesisir udah ngelala pemanah enggau pengenda lebih agi komuniti Dayak ke seruran ngemeratka pekara ke bekaul enggau Tanah Adat Bansa Asal (NCR) tauka tanah sida ke nadai bepala sereta enda dikelala perintah.

Seiku pakar politik, Prof Madya ari Singapore Management Universiti (Fakulti Sains Politik), Bridget Welsh madah, peranak menua Cambodia ku iya, chunto ke manah ke rayat menua pesisir di Sarawak.

“Di Cambodia, penyakal mujur bendar ketegal penanggul tanah tauka tanah orang asal enda dikelala, nya ditapi ulih rayat menua pesisir, lalu ba senentang tu, ke deka mai ubah ngagai komuniti menua pesisir diatu enggau jemah ila, enti dibanding enggau runding sida iya kelia.

“Enti enda diputar enggau manah, pekara bekaul enggau tanah sereta lanskap parti politik enda diatur manah, nya ke deka mai ubah. Nyangka iya enda ngenyampat nya tang pekara tu berat sereta patut diputar enggau jampat,” ku Welsh.

Iya madah baka tu lebuh dikerandau pengudah meri penemu maya ngemunka ‘2nd International Conference on Elections and Democracy: Continuity and Change’ di Fakulti Sains Sosial UNIMAS ditu, kemari, ke alai surat kabar The Borneo Post, Utusan Borneo enggau See Hua melanja semua pengawa tu.

Dalam atur pengawa nya, urung 120 iku penyerta antarabansa ngulu konferens dua hari ti di atur UNIMAS, Conference on Elections and Democracy enggau Sarawak Convention Bureau (SCB) ari 6 nyentuk 7 November tu.

Kelimpah ari nya, Welsh madah, pekara bukai nyangka nyengkaum infrastruktur sereta pemerat bukai ba komuniti menua pesisir, ku iya.

“Ambika chunto, aku empu udah beratika pengawa bepilih ngagai Pelagus, endang mar nuju sitak menua nya,” ku iya ke nyadi pemerati ba pengawa bepilih besai menua dalam taun 2008 enggau pengawa bepilih besai (parlimen) taun tu tadi.

Iya madah, kelimpah ari lanskap politik ke udah berubah ari diatu ngagai timpuh berapa taun tu ila, perintah mega patut betatika palan alai ngundi di menua pesisir digaga semak agi ari komuniti.

“Sebengkah timbal ke diterima aku, iya nya palan endur ngundi kelalu jauh ari pendiau komuniti menua pesisir lebih agi peranak menua ke tuai ngasaika pemar nurun ngundi lalu tau bendar ngusutka penyampau undi,” ku iya seraya ngarap timbal bansa tu patut dikemeratka dudi ila.