Friday, December 6

Nyerumba penemuai Gerempung Indu Dayak Sintang, SDNU ngatur pengawa beserumpu kena 23 November tu ila

0

KUCHING: Gerempung Bansa Dayak Sarawak (SDNU) deka nerima penemuai seraban indu Dayak ari Sintang Kalimantan Barat seraya beserumpa makai malam ba restoren M2 di Batu Kawa ditu kena 23 November tu.

Ketuai bagi penerang SDNU Ganchai Jinta madah, pengawa beserumpu tu ukai dikena ngumpul duit lalu taga 40 mija maya nya dijual nengah rega ke sebaka ditetapka restoren nya, RM350 semija ngagai kaban gerempung tauka ukai.

Presiden SDNU Tan Sri William Mawan Ikom diadang bejadika atur pengawa ke berambaika leka jaku “Beserumpu Makan Malam Nyerumba Penemuai Gerempung Indu Dayak Sintang Kalimantan Barat.”

Tikit mija makai nya tau dibeli ari opis SDNU ba Pusat Dagang King Centre ditu, ku iya lebuh dikerandau maya nyeput pagi ba Kota Sentosa kena Hari Dua tu tadi. Bela bisi mendingka randau nya, Mandal Presiden 1 SDNU, Anthony Banyan.

Barang sapa ke deka nemu enggau silik agi pasal pekara nya tau betelefon ngagai Ganchai nengah lumur 014-8822711, mandal presiden SDNU Anthony (019-8884800) tauka sekretari eksekutif Spencer Birai (010-8320433).

gMayuh atur pengawa ke memanah deka nyadi legit program malam nya. Temuai kitai mega deka dikelalu ngena adat asal,” ku Ganchai seraya madah, kaban Serakup Indu Dayak Sarawak mega deka ngulu atur pengawa nya.

Pengawa beserumpu tu mega sebagi ari indu program ke diatur SDNU. Kena 29 November 2013, kaban gerempung sereta pampang iya mega deka ke Singkawang enggau Pontianak ba penemuai rama seraya belajar.

Gerempung tu mega deka ngatur pekit main badminton berebutka Mangkuk Tan Sri William Mawan Ikom di Kapit berengkah 21 nyentuk 23 November, tandu iya.

Kena 6 nyentuk 11 Julai taun tu tadi, kaban gerempung enggau pampang tu mega bisi ngatur penemuai seraya ngabang Gawai Dayak di Sanggau enggau Pontianak, Kalimantan Barat, terang Ganchai.

Kelimpah ari nya, SDNU mega chakah ngatur seminar, peransang penyulut pelajar di serata Sarawak. Enda ditinggal mega, nembiak bansa Dayak ke nyulut ba akademik enggau ko-kurikulum deka diungkup perais peransang ngagai sida.

Dalam perambu SDNU, berengkah taun 2014, gerempung tu deka ngatur kelas tambah enggau woksyop ungkup nembiak sekula ke deka dibagi ngagai empat zon, Kuching, Sibu, Bintulu enggau Miri.

Empai lama ke udah SDNU bisi dipenggi perintah besai nengah opis Menteri Wang geran RM2 miliun ngambika tau ngemuntangka gerempung tu bejalaika atur pengawa.

Ngelansa sekeda sejarah, SDNU direjister kena 10 Mei 1955 lalu naka diatu iya bisi 103 pampang udah direjister sereta enam pampang protem.