Pelajar Rampa Menua dikearap nerenak penyiru nembiak rebak baru ba pekara nya, ku Jiram

0

SRI AMAN: Sapit Kontroller Kaunsil Pengeraja Asal enggau Rampa Menua Sarawak (NREB) Jiram Sidu madah, aktiviti Pelajar Rampa Menua chara ti engkeman dikena nempa rebak baru ti bisi pengerindu tauka penyayau ke rampa menua.

Taja pan sistem pelajar menua enda numbuhka sabjek khas ke tuju nya ku iya, tang elemen pelajar rampa menua patut dikemeran ba kurikulum nengah macham matapelajar ke diajar di sekula.

Nitih penerang ari iya, dikena nyukung pengawa nya, NREB, Opis Rampa Menua, Kaunsil Sungai Sarawak, Gerempung Kampung Sarawak, ijinsi perintah enggau kompeni chakah bejalaika aktiviti pelajar rampa menua di dalam enggau luar kelas.

“Chara tu enti dikemeran sereta dikemeratka belama deka meri pemanah ba nembiak laban sida diberi penemu pasal kereban tauka pekara ti diajar enggau dalam agi bekaul enggau rampa menua,” ku iya.

Jiram mansutka pekara nya lebuh nutup Bengkel Pendidikan Dan Kesedaran Alam Sekitar Bagi Kelab Pencinta Alam Sekitar (PALS) Sekolah Menengah Daerah Sri Aman enggau Lubok Antu di SMK Melugu, Sri Aman ditu empai lama ke udah.

Bisi 50 iku nembiak sekula sekondari ari Pelilih Sri Aman ngambi bagi dalam bengkel nya ti nyengkaum nembiak ari SMK Melugu, SMK Simanggang, SMK Saint Luke, SMK Sri Aman  enggau SMK Lubok Antu.

Kelimpah ari nya Jiram ngarapka mensia mayuh lebih agi nembiak berati, ngemerat, sayau sereta landik ngatur pengawa ti enda ngerusak rampa menua ke udah bisi diatu ke penguntung rebak dudi.

Bengkel pelajar rampa menua di SMK Melugu iya nya ti ketujuh serata nengeri Sarawak pengudah diatur di Lawas, Bintulu, Mukah, Kapit, Sibu enggau Saratok.