JULAU: Perintah Barisan Nasional (BN) deka ngamatka semua semaya enggau rayat ke digaga sida maya Pengawa Bepilih Besai Ke-13 (PRU13) tu tadi.
Kaban Parlimen Julau, Datuk Joseph Salang Gandum madah rayat patut ngembuan ulah ke manah sereta liat ati nganti perintah ngamatka semua semaya nya.
“Enti sekeda projek tauka belanja ke disemaya nya bedau bisi, ukai reti nya terus nadai datai.
“Projek tauka belanja nya kekadang ulih dipejalai tauka diberi enggau lengkas tang kekadang laun. Taja pia endang tetap bisi. Perintah enda ulih meri semua peminta enggau belanja ngagai rayat sereta magang. Ba semua kandang menua,” pia ku iya lebuh ti nyaka geran pemansang RM1 juta ari perintah ngagai urung 50 iku Chairman Komiti Pemansang enggau Pengelikun Kampung (JKKK), Pakan enggau Bayong di Rumah Bangau Lubok Guchi, Merurun/Entabai ditu ensanus.
Sama bisi maya nya DO Julau, Chumang Nyambong enggau Tuai Rumah Bangau.
Geran ke disua iya disemayaka Kepala Menteri, Pehin Sri Abdul Taib Mahmud lebuh ke nemuai ngagai rumah panjai Rumah Jali pun taun taun tu tadi.
Ku Salang, iya berasai asa endar ati lebuh nemu bisi sekeda orang enda liat ati nganti sereta nabur penemu ke enda manah sentang perintah sereta nyalahka pengari rayat semina ketegal sesebengkah projek tauka geran ti disemaya perintah BN laun diberi.
Ku iya, genap bengkah bantu ke diberi perintah BN enda ngelala sesapa sekalika sida nyukung penyakal tauka perintah. Tambah mega perintah enda bechiping ati.
“Taja pia, manah agi enti penyukung penyakal ngenang utai ti udah dipejalaika perintah BN,” ku iya.
Iya mega meransang bala tuai rumah panjai, sekalika sida udah nerima surat padu tauka benung nganti,ngedutka kaul enggau Opis Betanam Betupi tauka Opis Pengintu Pengelantang Pendiau ba Pelilih Mit menua nya.
Ku iya, nengah chara nya sida nemu perambu enggau polisi perintah ke pemadu baru dikena mantu rayat nambahka penatai pemisi sereta lalu nyungkak tikas pengidup sida ngambika menyana agi.
“Kami bisi tujuh taun agi endur ngemujurka juluk menua Malaysia ngambika nyadi sebuah menua ke maju sereta berpenatai pemisi besai.
“Perintah diatu benung mantu peranak menua pesisir teulihka penatai pemisi ke besai nengah sekim nanam getah, sawit enggau lada. Uji tanya bantu nya ari Opis Betanam Betupi ke semak engagu kita,” ku iya.
Ku Salang, bala tuai rumah mega patut ngelala sida serumah ke seranta sereta ngerejister sida ba Opis Pengintu Pengelantang Pendiau, ngambika sida ulih nerima bantu ke patut.
Lebuh ke bejaku sentang leka jaku ‘Allah’, ku iya, Menteri Besai Datuk Seri Najib Tun Razak madah raban Keristin di Sabah enggau Sarawak dikemendarka ngena leka jaku Allah maya sida besembiang.
Taja pia ku iya, asa endar ga asai ati laban raban Keristin di Semenanjung Malaysia enda dikemendarka ngena leka jaku Allah.