Sunday, December 15

Politik Sarawak tegut disemaka baka pun mulung

0

DIPENYADI: Jabu (kanan) enggau bini iya (dua kiba) enggau Fatimah (kiba) bejadi Karnival Balau ngaga linut ihya nya sebengkah pemakai asal bansa Melanau, ensana.

Pengawa penyakal ke deka nyilih perintah ke diatu nya deka puntan laban rayat nyukung BN

MUKAH: Penegap politik Sarawak tau disempamaka baka pun mulung asil ari kerejasama enggau penyerakup rayat, pia ku Sapit Kepala Menteri Datuk Patinggi Tan Sri Alfred Jabu Numpang.

Ku iya, penyakal seruran nguji deka megai perintah ke diatu, tang lalu bedau ulih laban rayat balat berakup sereta nyukung perintah Barisan Nasional (BN).

“Aku nadai kala ninga pun mulung tumbang kediri. Mulung mayuh akar ke nyukung sereta ngenegapka iya.

“Penegap politik asil ari iring ketuai BN ba kandang menua tu tau disempamaka baka pun mulung ke tumbuh tegap ketegal sukung ari semua serak mensia mayuh,” pia ku iya lebuh bejadika Karnival Balau Dalat 2013 ba Tebing sungai Dalat ditu, ensanus.

Iya ke mega Menteri Betanam Betupi Moden sereta Menteri Pemansang menua pesisir madahka perintah diatu seruran deka nentuka tikas pengidup maju sereta ngemeratka transformasyen rayat.

Ku Jabu, Karnival Balau ke diatut sekeda ijinsi enggau opis perintah engkeman amat endur nerangka sentang chara ngemayuhka asil ari mulung.

“Kami bisi ijinsi ke bekaul enggau pekara nya baka Opis Betanam Betupi ke ulih meri lalau sentang chara ngemayuhka asil ari mulung, ngambika ulih nyingkang jauh agi.

“Kelimpah ari nya, nengah karnival diatur tu mega ulih ngetanka gaya pengidup ngambika enda punas dialahka pemansang dunya,” ku iya.

Berebak enggau pengerami nya, Jabu ngungkupka belanja RM30,000 ninting kali Karnival Balau diatur dudi ila.

Sebedau nya, Kaban Kunsil Nengeri (ADUN) Dalat Datuk Fatimah Abdullah madahka, Karnival Balau Dalat nya diatur sua taun sekali nitihka kalendar aktiviti Pelilih Mit Dalat.

Karnival Balau 2013 tu, ti kelima kali udah diatu.

“Batang tuju ngatur Karnival tu dikena ngenagapka industri sagu ba kandang menua Dalat kelebih agi di Bagi Menua Mukah.

“Bisi lima buah kilang meroses tepung sagu didudukka ditu diatu, lalu sebuah agi kilang ari Jepun, tang benung digaga diatu.

“Pengawa perintah menua ke deka nyungkak ekonomi bepelasarka ari utai tanam, siti ari chara ngulihka dua pengambi,” ku iya.

Sama bisi ngulu pengerami nya, bini Jabu, Dato Sri Empiang Jabu, Datuk Dr Adi Badiozaman, ADUN Jemoreng Abu Seman Jahwie enggau bala temuai bukai.