KUCHING: Matau ari baruh enggau ari langit seraya bejalaika pansik entara atur pengawa ke dipejalaika perintah dikena mutarka ulah berimbaka kayu batang enggau nadai pemendar ti nyadi ba sitak Balai Ringin apin lama ke udah.
Menteri ba Opis Kepala Menteri Datuk Amar Tan Sri Adenan Satem madahka pekara nya lebuh ti nyimpul jurai ngarika opis kepala menteri maya Aum Kunsil Nengeri (DUN) di Kompleks DUN ditu kemari.
Seraya nyaut tanya ari Kaban Kunsil Nengeri Balai Ringin, iya madah, pengawa nya dipejalaika begulai entara opis tauka ijinsi ti bekaul.
“Pasal pengawa berimba kayu batang enggau nadai pemendar ba sitak (Balai Ringin) nya, perintah udah bejalaika atur ke menuku baka matau ari baruh enggau ari langit seraya bejalaika pansik ba kandang menua nya.
“Ngenang pengawa bejalai matau lebuh malam hari sereta dikena nyeliah seberang penyadi, kitai ngaul Polis Di-Raja Malaysia (PDRM), Pasukan Gerakan AM (PGA), Suruhanjaya Pencegahan Rasuah Malaysia (SPRM), Agensi Penguatkuasan Maritim Malaysia (APMM) enggau Gerempung Kampung Sarawak (SFC),” ku iya.
Nambahka nya iya ti mega Menteri Tugas-Tugas Khas madah, kerejasama ari peranak menua nya amat beguna dikena ngenukuka pengelikun enggau pengelantang.
Perintah maduka peranak menua nya empu nyadi ‘honorary wildlife rangers’, ku iya.
“Pengawa sida tu, ngeriput enti bisi tetemuka sebarang penyelai nyadi ba kandang menua sida.
“Enti bisi riput ari sida, kitai deka mutarka pekara nya enggau jampat,” ku Adenan.
Maya bejuraika Belanja 2014 ba aum DUN apin lama ke udah, Kaban Kunsil Nengeri Balai Ringin Snowdan Lawan bisi nanyaka chara perintah mutarka kes berimba kayu batang enggau nadai pemendar ba sitak iya.