Tanggamka kaul enggau pemesai perintah kena ngulihka penerang penyungkak tikas pengidup
SARIKEI: Bala Tuai Rumah (TR) dilalau chakah agi bejalaika tanggungpengawa mantu peranak rumah panjai nuju jalai pemansang.
Chairman Penyanding Penemu Kaunsil 1Malaysia Sarawak Datuk Joseph Salang Gandum madah, tanggungpengawa nya patut disan semua Tuai-tuai Rumah di nengeri tu baikka sida udah sah dipadu tauka benung mangku pengawa tuai rumah.
“Timpuh kitai (perintah) deka teulihka komuniti ba menua tu bepenatai pemisi tinggi semina urung tujuh taun agi maya nuju Wawasan 2020.
“Kitai patut nyikap diri ari diatu nyadi sebengkah komuniti ke bepenatai pemisi tinggi kelebih agi nengah pengawa betanam betupi chara dagang,” ku iya ba pengerami Ketuai Begulai enggau Rayat di Rumah Papit Brandi, Sungai Kuap (Sungai Rusa) semak ditu, kemari.
Sama bisi datai bini iya Datin Lucy enggau Residen Sibu Sim Kok Kee.
Nyerumba pengerami nya, Salang mega bejadika jalai semin enggau ngelancharka pengerami mandangka mayuh bansa buah ba rumah panjai nya.
Salang ke mega Kaban Parlimen Julau ngansak Tuai-tuai Rumah ngambika suah agi betemu sereta ngerapatka kaul enggau Residen, Pemesai Opis Pelilih Mit enggau mega Pemesai Opis Betanam Betupi kena ngulihka penerang bekaul enggau polisi pemansang ke benung diatur sereta perambu perintah kena nyungkakka penatai pemisi rayat kelebih agi ba menua pesisir.
Ku iya, antara program kena nyungkakka penatai pemisi rayat ke diberi kelala perintah baka getah (belabuh nanam enggau nanam baru), lada enggau sekim nanam kelapa sawit.
“Enti peranak menua pesisir agi idup ba tikas penyeranta 10 taun ari diatu, nya berindik ari sida ti ngenggaika pemansang dibai perintah kena mantu sida.
“Pekara tu enda patut nyadi lalu enda patut diasuh nyadi,” ku tandu iya.
Salang madah, berebak enggau nya mega, Tuai Rumah mesti ngenataika semua penanggul ke bekaul enggau peranak rumah panjai ngagai Pemesai Opis Pelilih Mit ngambika diputar enggau jampat.
“Tu beguna bendar ngambika semua pemesai tu nemu penanggul ke ditapi peranak rumah panjai. Sida ulih mantu mutarka penanggul nya,” ku iya.