KUCHING: Menteri ba Opis Menteri Besai Nancy Shukri besemaya nyaup Gerempung Nagang Ngemediska Jelu (SSPCA) ngiga belanja dikena ngaga kelinik meriri jelu ditu.
Iya madah klinik nya deka mantu orang ke kurang penatai pemisi meriri jelu tupi sida nyengkaum jelu baka ke disedia di SPCA Selanggor enggau Dewan Bandaraya Kuala Lumpur (DBKL).
“SSPCA bisi ngenataika pinta ngagai Opis Kunsil Kandang Menua ngambika mantu ngaga siti Kelinik Meriri baka ke di Selangor enggau DBKL.
“Berindik enggau nya, aku deka nyaup SSPCA ngiga belanja ngemujur projek lalu aku deka ngenataika pekara tu ngagai perintah,”ku iya maya bejaku ba program Bazar Amal Krismas SSPCA 2013 di Palan Ekumenikal Kristian, Jalai Stampin kemari.
Nancy nambah, program nya manah lalu tau matau pemayuh jelu ti bekesindau ba dalam mengeri.
Ku iya, kitai ngarika perintah deka ngiga chara pemadu engkeman nyaup SSPCA nyapai juluk lalu nentuka Mengeri Kuching nadai penuh jelu ti bekesindau sengapa ke alai nya sigi segaris enggau program opis kandang kunsil Mengeri Likun, Beresi enggau Manah Dipeda,” ku iya.
Ba kaul ke sama, iya muji pengawa manah raban ti udah ngemujur bazar pengasih ke diatur enggau tuju mantu SSPCA.
“Kitai begempuru ditu sehari tu ngereja pengawa amal ngambika ulih mantu SSPCA bejalaika atur ngintu pemaik jelu ke bekesindau ba mengeri tu,”ku iya.
Ketegal nya, iya ngarap komitmen ke udah dipandang ngelamatu ulih dipajakka agi lalu nentuka pekara nya diputar enggau manah.
Dulu agi ari nya, Presiden SSPCA Dona Dury Wee madah bazar amal nya dibuka tiap ujung minggu ngambika bala jelu tu bisi palan alai sida diau.
“Minggu tu aja kitai udah nyelamat 300 iku jelu, mayau enggau ukui. Penyampau tu chukup besai lalu enti enda diintu enggau manah, penyampau tu deka majak nambah.
“Ungkup taun 2012 kitai udah nerima 5,055 iku jelu,” ku iya seraya ti madah Klinik Meliri patut digaga enggau lengkas.
Bela datai Chairman SSPCA Rebecca De Cruz enggau volonter SSPCA.