Sunday, October 20

Ketegal enda tetapika penyarut ruang bilik seiku lelaki nguji terejun munuh diri

0

KUCHING: Ketegal enda liat ati napi penyarut dalam ruang bilik, seiku lelaki ari Kampung Siol Kandis nguji terejun ari ringkat atas menara Dewan Suarah ditu kemari laban deka munuh diri.

Kepala Polis Pelilih Kuching ACP Roslan Bek Ahmad ke ngesahka penyadi nya madah, lelaki beumur 32 taun nya keterubah iya ditagang jejaga dia tang diamang iya ngena pisu.

Udah bekau nerima kangau, Kepala Balai Polis Sentral Insp Ricky Poh disempulang 10 iku raban bomba ari Balai Bomba Batu Lintang berumban angkat ngagai tempat nya.

“Iya dipujuk niki tang enggau mansutka jaku mengkang megai lungga.

“Udah semak sejam Ricky mujuk, pemesai bomba ngambi awak benung iya lina lalu narit rekung baju sambil raban bukai ngerampas pisu,” ku iya lebuh ke dikerandau, kemari.

Lelaki nya lalu dibai ngagai balai polis.

“Asil tasat tumu nemu lelaki nya bisi bini dua iku enggau dua iku anak lalu bisi penyarut ba ruang bilik,” ku iya sambil nambah, dua iku bini iya lalu dikangau.

Ku iya, tasat nya mega nemu lelaki tu udah tiga bulan enda pulai ke rumah.

Riput polis udah digaga lalu tasat benung dipejalai.