RTM Sibu ngatur pengerami mantar Krismas enggau mensia mayuh

0

LANDIK MAGANG: Abu Seman (tengah) ukai semina seiku orang politik tang mega penyanyi ke ngembuan mayuh peneleba seraya landik betanda ‘poco-poco’ begulai enggau Albert Tudin (kiba) enggau seiku penyanyi tebilang, Urai.

ENDA RANGKAI NGELI: Mensia enda ngetu geginyik ketawaka penyenaka kelulu Bunyau enggau Mujap maya atur pengawa nya ditu.

SIBU: Beribu iku mensia ari mayuh macham pupu raban bansa udah datai ngulu pengerami ‘Panggau Krismas’ ke diatur RTM Sibu Seksyen Iban, ba laman RTM Sibu, empai lama ke udah.

Program nya udah dipenyadika Sekeretari Politik Kepala Menteri ke mega Kaban Kunsil Nengeri Jemoreng, Abu Seman Jahwie.

Kontroller RTM Sibu, Albert Mentri Tudin mega sama bisi dia maya pengerami nya.

Malam nya, mensia mayuh ke ngulu pengerami nya diperindang sekeda penanyi Iban ke tebilang di menua tu baka Urai, Gerup lagu rock Iban, ‘The Crew’,  Rickie Andrewson, Winnie Albert enggau Clemence Joys.

Kelimpah ari nya, sida mega diperindang dua iku penjenaka tebilang Iban, Bunyau enggau Mujap ti enda ngengetu ngelika ati mensia mayuh enggau bala VIP.

Mensia mayuh malam nya mega bepeluang mendingka YB Abu Seman belagu ke ditankanka enggau betanda pocho- pocho.

Seraban gerup Koir mega bisi merindang mensia mayuh malam nya enggau sekeda lagu Krismas.

Program nya mega diatur beserimbai enggau pengawa ngintu penumbuh RTM Sibu genap 39 taun.