Wednesday, November 30

Perintah chakah ngemansangka peranak menua pesisir, ku Nanta

0

RIAN TINGKAR: Jaafar (kiba) nerima replika chek dividen 2013 sepenyampau RM6.47 juta ari FELCRA Berhad Wilayah Sarawak ti disuaka Nanta seraya dikemataka Ramlee (dua kiba) enggau Rabiah (dua kanan) sereta Aidel (kanan).

Nengah FELCRA Bhd, RM6.47 juta ungkup interim keterubah enggau kedua udah diagih ngagai 4,189 pesereta ba taun 2013

KOTA SAMARAHAN: Perintah chakah ngemansang sereta nyungkakka penatai pemisi peranak menua pesisir, ku Sapit Menteri Pemansang Menua Pesisir enggau Kandang Menua Datuk Alexander Nanta Linggi.

Ku iya, sebengkah chara dikena mantu iya nya nengah Opis Menteri Pemansang Menua Pesisir enggau Kandang Menua nengah FELCRA Berhad.

Berindik ari nya, bisi 4,189 iku pesereta FELCRA Berhad Wilayah Sarawak udah nerima dividen sepenyampau RM6.47 juta ungkup interim keterubah enggau kedua asil ari penguntung bulan Januari ngagai Oktober 2013.

Tandu Nanta, penyampau penerima tauka pesereta nya nyengkaum 12 kandang menua.

Iya madahka pengawa ngagih tauka meri dividen nya bepelasarka pemesai tanah enggau penyulut projek tauka ladang ba timpuh nya (2013).

“Ba taun 2013, FELCRA Berhad Wilayah Sarawak ngagih tauka meri dividen ari interim keterubah enggau kedua ngagai 4,189 iku pesereta enggau penyampau dividen RM6.47 juta.

“Bisi 12 kandang menua ti kena bungkur pengawa ngagih dividen tu. Ari penyampau nya, tiga kandang menua ti nerima dividen pemadu tinggi iya nya Saratok sepenyampau RM1.5 juta, Mukah (RM1.19 juta) enggau Lundu sepenyampau RM1.17 juta,” ku iya.

Nanta mansutka pekara nya lebuh bejaku seraya bejadika Pengerami Meri Dividen Taun 2013 ngagai pesereta FELCRA Berhad Wilayah Sarawak ti diatur FELCRA Berhad ba Dewan Suarah Kota Samarahan ditu, apin lama ke udah.

Bejaku baru iya madah, pemujur tauka penguntung ti diasaika pesereta seharitu asil ari penyerakup antara FELCRA Berhad Wilayah Sarawak enggau pesereta ba pengawa ngemansangka projek tauka ladang.

“Kitai ngarapka penyerakup tu ulih dipajakka ngambika semua piak kelebih agi raban pesereta enggau ruang bilik sama ngasaika penguntung,” ku iya ke mega Kaban Parlimen Kapit.

Tambah mega ku Nanta, endang juluk perintah deka ngenukuka rayat menua pesisir sama ngasaika pemansang sereta teulihka penyungkak ekonomi ngagai tikas ti lebih tinggi.

Kelimpah ari nya Nanta mega ngelalau raban pesereta ngambika ngemeranka ulah deka bedagang ngambika ulih ngenataika penguntung ngagai ruang bilik.

“Raban indai enggau orang indu ti kena bungkur projek FELCRA patut bisi pengibuh deka nyereta program ti bisi diatur Opis Betanam Betupi, ngambika ulih mantu nyungkakka tikas penatai pemisi enggau pengelantang ruang bilik.

“Kitai ngarapka sukung ari pesereta ti masuk program pemansang tanah ti dipejalaika FELCRA sereta perintah,” ku iya seraya beterima kasih ngagai FELCRA Berhad ti mantu ngemansangka rayat menua pesisir Sarawak.

Ba pengerami nya, Nanta diberi basa nyuaka replika cek dividen 2013 ngagai pengari pesereta FELCRA Berhad Wilayah Sarawak Mohd Jaafar Ellon.

Sama bisi datai ba pengerami nya, Ketuai Pemesai Eksekutif FELCRA Berhad Datuk Ramlee Abu Bakar, Kaban Perlimen Kota Samarahan Rabiah Wang, Kaban Kunsi Nengeri (ADUN) Sadong Jaya Aidel Lariwoo enggau bala ke bukai sereta 500 iku pesereta FELCRA Berhad Sarawak.