KUCHING: Sepenyampau 415 iku nembiak ari lima buah sekula mengkang tejanggal ba pelajar ketegal penusah tasah bah ti nyadi di nengeri tu.
Penyampau nya bepelasarka penerang ari Opis Pelajar Nengeri Sarawak (JPNS), ‘Laporan Pengoperasian Sekolah’ ti kena penusah tasah bah tauka jalai ke sekula putus ketegal bah (sekula ditutup) naka pukul 3.00 lemai kemari, 7 Januari 2013.
Lima buah sekula ti mengkang ditutup naka pukul 3.00 lemai kemari iya nya SK Kg Klid/Plajau, Dalat bisi 89 iku nembiak; SK Nanga Bon, Sibu (83 iku nembiak); SK Sg Salim, Sibu (106 iku nembiak); SK Sg Siong Tengah, Sibu (83 iku nembiak) enggau SK Nanga Nirok, Kanowit bisi 54 iku nembiak.
Nitih penerang nya, SK Kg Klid/Plajau, Dalat enggau SK Nanga Nirok, Kanowit mengkang ditutup ketegal sekula nya ampuh bah.
Lalu SK Nanga Bon, Sibu enggau SK Siong Tengah, Sibu mengkang ditutup laban jalai nuju dua buah sekula nya putus ketegal ampuh bah.
Nembiak SK Sg Salim, Sibu enda ulih besekula laban sekula enggau jalai ngagai sekula nya putus kena ampuh bah.
Bepelasarka rikut JPNS naka pukul 8.00 pagi ensanus (6 Januari 2013) sepenyampau 523 iku nembiak mengkang enda ulih nurun besekula ari enam buah sekula.
Enam buah sekula nya nyengkaum SK Kg Tegageng, Subis ti bisi 103 iku nembiak; SK Kg Klis/Plajau, Dalat (89 iku nembiak); SK Nanga Nirok, Kanowit (54 iku nembiak); SK Nanga Bon, Sibu (88 iku); SK Ulu Sg Sengan, Sibu (88 iku) enggau SK Sg Salim, Sibu bisi 106 iku nembiak.