Tu beduduk ari gaya hari ti ujan dipelabaka nyentuk ngagai TBC taun tu
KUCHING: Opis Pengintu Pengelantang Raban Bansa (JKM) udah nyikap diri napi gelumbang kedua penusah tasah bah di nengeri tu.
Menteri Pengintu Pengelantang, Pekara Orang Indu enggau Pemansang Ruang Bilik, Datuk Fatimah Abdullah madah, nya beduduk ari gaya hari ti ujan dipelabaka nyentuk ngagai Taun Baru China (TBC) taun tu.
Iya madah, semua Komiti Penyah Penusah Nengeri Sarawak (JPBN) dipinta nyikap diri betapi enggau penusah tasah bah gelumbang ke-2.
“Taja pan gaya hari diatu majak manah, penyampau orang ti kena penusah tasah bah udah kurang sereta palan pengenduh penusah ampuh bah mayuh ditutup, kami (JKM) baka ti dilalau Chairman Komiti (JPBN) Datuk Patinggi Tan Sri Alfred Jabu deka terus besedia sereta nyikap diri nyentuk ngagai maya Chap Goh Mei.
“Kami (JKM) diatu mega udah nyendiaka macham pemakai (beras, gula, kopi, biskut, minyak makai sereta pemakai dalam tin) di Pangkalan Hadapan kena napi penusah tasah bah gelumbang Ke-2,” ku iya be sebengkah aum pengarang berita ditu pagi kemari.
Nambahka nya Fatimah madahka JKM naka ke diatu udah ngeluarka bantu pemakai ti beungkus RM233,285 ti disadung ngagai orang ti kena penusah tasah bah di nengeri tu.
“Bepelasarka statistik ari Bilik Operasi JKM, berengkah ari 20 Disember 2013 nyentukka seharitu 7 Januari 2014 (kemari) naka pukul 9 pagi, sepenyampau RM233,285 bantu pemakai udah disadung ngagai 3,991 ruang bilik ti nyengkaum 21,996 iku orang kena penusah tasah bah ba 147 bengkah kandang menua di nengeri tu,” ku Fatimah kemari.
Ku Fatimah, naka pukul 9 pagi kemari semina dua palan pengenduh penusah ampuh bah agi dibuka iya nya Balai Mensia Mayuh Bakong ke endur 17 ruang bilik ti nyengkaum 76 iku orang ari Kawasan Setinggan, Bakong enggau Dewan Sukan KPSU Tatau ti bisi 40 ruang bilik ke mungkur 151 iku orang ari Kampung Dagang.
Berebak enggau tu iya ngelalau rayat menua pesisir lebih agi tuai raban bansa ti kena penusah tasah bah seruran madah tauka ngenataika berita ngagai JKM sereta Opis Residen bekaul enggau pekara bah.
“Enti sema rumah panjai di menua pesisir kena penusah tasah bah putus penyambung, tuai raban bansa baka tuai rumah tauka penghulu patut selalu madahka (betelefon) ngagai JKM tauka Opis Residen, kelebih agi bekaul enggau bantu pemakai,” ku iya.
Dulu ari nya iya bejadika “Quantum Neurofeedback Center” ti diatur ba Jalan Green ditu kemari.