JAMES MASING
Isu leka jaku ‘Allah’ udah nyadi pekara politik sereta deka majak mar diputar
KUCHING: Penyarut deka majak mar diputar enti Perintah Besai enda ngenegapka penemu sereta mutarka isu bekenaka leka jaku ‘Allah’ enggau lengkas.
Presiden Parti Rakyat Sarawak (PRS) Tan Sri James Masing madah, pekara tu enda muntang lebang kediri laban udah nyadi isu politik.
Iya ke mega Menteri Pemansang Tanah muji penemu parti penyakal, PAS ke minta Kaunsil Fatwa Nasional nyerenih pengulih tauka pengenda leka jaku ‘Allah’ dikena di semenanjung Malaysia baka ke dikemendar di Sabah enggau Sarawak.
“Sekali tu bisi nyelai, ukai BN tang PAS sedia matak jalai dikena mutarka isu pengulih enggau pengenda leka jaku ‘Allah’ dikena. Tu penanggul politik, ukai utai muntang lalu enti enda diputar enggau manah dia iya tau ngujungka penyadi pekara bukai,” ku iya lebuh dikerandau The Borneo Post.
Kena Hari Satu tu tadi ketuai Penerang PAS Datuk Mahfuz Omar mansut penemu minta Kaunsil Fatwa Nasional mutuska pengulih enggau pengenda leka jaku ‘Allah’ dikena di semenanjung baka di Sabah enggau Sarawak. Chara tu mega enda ngenyarutka penemu seraya nyeliahka sekeda anggap ba Islam.
Bejaku ba indu opis PAS di mua pemberita iya madah, mensia deka bebalut penemu berindik ari menua kitai tu bisi dua pasang undang-undang ke alai, raban keristin di Sabah enggau Sarawak dikemendar ngena leka jaku ‘Allah’ tang ditagang di semenanjung.
“Diatu bisi dua bengkah penemu; Jais (Selangor) madah leka jaku nya (Allah) enda tau dikena tang peranak menua ke ukai Islam di Sabah enggau Sarawak dikemendar. Mensia mayuh deka nemu sekailka Jais patut dititih nunda ajar Islam tauka ejensi jalai pengarap bepelasarka undang-undang ari Perintah Besai,” ku iya.
Mahfuz mega ngansak Kaunsil Fatwa Nasional mutuska atur ngena dua bengkah undang-undang. Ba penemu PAS, parti nya ngelempaika pemutus ba Kaunsil Syura ke ngemendarka leka jaku ‘Allah’ tau dikena raban keristin enggau menuku.
PAS mantaika penemu sida berindik ari isu Jais ke nyerungkai Gerempung Injil Malaysia (BSM) di Damansara minggu nyin tadi sereta ngerampas 310 buah Al-Kitab dalam Bahasa Malaysia (BM) sereta 20 buah Bup Kudus dalam Jaku Iban nyengkaum 20 buah Gospel Luke ke ditulis dalam BM
Ba pemutus 10-poin Putrajaya ti dikeluarka opis Menteri Besai Datuk Seri Najib Tun Razak ba taun 2011 ngemendarka pengawa nyelak, ngimport sereta nyadung Injil ke ngundan leka jaku ‘Allah’, orang keristin di Sabah enggau Sarawak mega dikemendar ngena leka jaku ‘Allah’ nyebut petara sida.
Maya penerang Najib kena bulan Oktober 2013 tu tadi, pemutus Kot Apil nadai kaul enggau leka jaku ‘Allah’ ke dikena di Sabah enggau Sarawak.