Simoi: Atur pemansang deka muntang dipejalai

0

KELAI PENGAWA: Simoi (tengah) ngerat riben ba penama ngagai rumah panjai nya dikena ngepunka atur pengawa.

Pemanah kempit entara kaban JKKK enggau ejensi perintah ulih ngemuntangka penyikap perengkaguna dikenatai ngagai rayat

SRI AMAN: Atur pemansang ti diungkup ke rayat deka muntang agi dikenatai sereta dipejalaika enti Komiti Pemansang enggau Pengelikun Genturung Pendiau (JKKK) bela bekempit enggau perintah.

Kaban Kunsil Nengeri (ADUN) Lingga Simoi Peri madah, enti nadai kaul sereta kempit entara kededua ejensi nya, juluk deka ngemanahka pengidup rayat mar dijapai.

“Kitai ngarap, genap kaban JKKK di serata nengeri tu nyukung program pemansang perintah ngambika semua kandang menua ke begunaka penyikap perengkaguna muntang dipenggi,” ku iya.

Iya bejaku munyi tu ba sebengkah atur pengawa betemu enggau rayat di Rh Able Bakar, Stumbin, Sri Aman empai lama ke udah.

Ku iya, perintah endang ngemeratka pengelantang pengidup rayat lebih agi peranak menua pesisir ngambika ulih nyungkak sosio ekonomi sida.

Berebak enggau nya, Simoi ngelalau kaban JKKK ngambika seruran ngemeratka pemujur sereta pemansang pelajar anak sida.

“Aspek pelajar anak kitai patut bendar dikemerat kena nyikap sida napi pengidup jemah ila,” ku iya.

Bela bisi nyempulang Simoi ba pengawa nya, pengari Menteri Pemansang Pekara Indu, Ruang Bilik enggau Raban Bansa ke mega kaban parlimen Batang Lupar,

Kaunselor Kunjang Nanang, Pemantu Khas Simoi, Nassir Johan sereta ke bukai.

Kelimpah ari nya Simoi mega bisi nyuaka geran pemansang menua pesisir penyampau RM5,000 ungkup JKKK Rh Able dikena nyeruri perabung rumah panjai sida sereta RM1,500 ungkup Biro Indu sida.

Dikena ngerene atur pengawa nya, pekit ‘poco-poco’ mega bisi diatur.