KUCHING: SUPP mejah pengawa Opis Agama Islam Selangor (JAIS) ke beserungkaika opis Gerempung Injil Malaysia (MBS) sereta ngerampas Al-Kitab seraya madah, ulah baka nya ukai ari runding mensia ke rinduka pengelikun tauka pengelurus undang-undang.
“SUPP rindu sereta nyukung pemanah ulah bebatak asur baka ti dirintai dalam undang-undang menua. Nadai seiku kitai tau ngena kuasa ngemaruhka orang bukai ke sama ngemeranka jalai pengarap diri,” ku penerang ke dianjung ngagai bilik berita ditu malam Hari Dua pengudah aum CWC tu tadi.
Berebak enggau nya, parti nya mega minta semua piak ngendiauka diri berundingka mutar ngena jalai ke menyana seraya nyeliahka sebarang penemu ke tau ngeruga pengelikun menua.
Nengah CWC, SUPP besetuju mantaika penemu pengudah mendingka mayuh sebana berindik ari ulah Jais ke nyerungkai BSM minggu nyin kemari.
Ulah ke nyadi di Damansara, Petaling Jaya, mandangka Jais ngerampas 310 buah Al-Kitab dalam bahasa Malaysia (BM), 20 buah Bup Kudus dalam Jaku Iban nyengkaum 20 buah Gospel Luke ke ditulis dalam BM.
Ba pemutus 10-poin Putrajaya ti dikeluarka Opis Menteri Besai Datuk Seri Najib Tun Razak ba taun 2011 ngemendarka pengawa nyelak, ngimport sereta nyadung Injil ke ngundan leka jaku ‘Allah’ seraya orang keristin di Sabah enggau Sarawak mega dikemendar ngena leka jaku ‘Allah’ nyebut Petara sida.
Ba penerang Najib kena bulan Oktober 2013 bekaul enggau pemutus Kot Apil, iya madah, leka jaku ‘Allah’ enda ditagang dikena di Sabah enggau Sarawak.