LAW
KUCHING: Kes pengelenyau pistol seiku raban polis kena Hari Minggu nyin tadi ketegal pengilap raban polis nya, ku Sapit Kepala Polis Sarawak Datuk Law Hong Soon.
Ku iya, asil ari pansik tumu, sida nadai tetemuka bisi ngelanggar prosedur operasi standard (SOP) dalam penyadi nya.
“Kami deka beratika enggau silik kes tu, lalu enti pemutus kepenudi ketegal pengilap, iya deka ditinggang ukum disiplin,” ku iya madah ngagai pemberita maya dikerandau ba ‘Majlis Serah Tugas Komander PGA Briged Sarawak’ di Kem PGA Sarawak Batu Kawa, kemari.
Dalam penyadi nya, senyata nya dipelabaka dichuri ari kaban polis ke dipadahka mabuk lalu tetinduk dalam kerita iya.
Kes pengelenyau senyata nya mega dipadahka bisi bekaul enggau dua pistol ke ngundan 21 leka seterum bansa P99 ditemu bedau lama ke udah ke dikena dua iku saspek ngerumpak sereta mechahka cheremin kerita di Satok apin lama tu ke udah.
Tandu Law, nya sebengkah pengilap polis ti ngujungka pistol iya dichuri saspek lalu dikena nguji ngerumpak sebuah kerita ke dipaking di sebuah palan komersil bedau lama tu tadi.
“Kami enda nyangkal kes nya pengilap polis nya, tang kami deka nasat ari tiap sukut kes nya,” ku Law.
Raban polis ke bempu pistol nya, agi ditan ba Balai Polis di Lundu seraya kes nya benung ditasat.
Bedau lama tu tadi, pengawa salah nguji ngerumpak sebuah kerita nyadi semak enggau Jematan Gantung Satok urung pukul 11 pagi alai dua iku saspek nguji ngerumpak kerita nya tang enda mujur laban dipeda orang mayuh enggau polis ke benung mansa endur nya lebuh penyadi nya lalu seiku ari saspek ke ngena pistol nya sempat ngelarika diri ari endur penyadi nya lalu seiku agi mujur kena tangkap.
Berindik ari pengawa nguji ngerumpak nya, dalam tasat keterubah polis tetemuka surat ke bisi bekaul enggau pistol nya ke dipelaba enggi raban polis ari menua Lundu nya.