Nembiak PBB Sarawak ngenataika bantu ngagai peranak RH Jelani

0

MIRI: Pampang Nembiak Parti Pesaka Bumiputera Bersatu (PBB) Sarawak udah nyuaka bantu ngagai peranak rumah panjai Jelani Mambang di Saeh Niah, ke dituntung penusah angus.

Ba penusah nya, rumah panjai sida ke beumur 40 taun, udah retung laban api.

Kaban Kunsil Nengeri (ADUN) Lambir ke mega Mandal Ketuai Nembiak  PBB Sarawak, Ripin Lamat udah ngawakka diri ngabas peranak rumah panjai ke tasah nya, lemai kemari.

Iya mega nyuaka bantu belanja RM10,000 ari Nembiak PBB Sarawak, ngagai Tuai Rumah Jelani Mambang, ti ngarika sida serumah.

Kelimpah ari nya, sida serumah nya mega nerima bantu 100 bungkus beras ari Padiberas Nasional Berhad (BERNAS) Sarawak.

Ku Ripin, bantu nya dikenataika nengah program Armada Pemuda PBB.

“Kami berasai sinu meda penusah ke udah nuntung sida.

“Kami arapka penusah nya tau nyadika lalau ngagai mensia mayuh ti diau ba rumah panjai bukai, ngambi sida ngemeratka pengelikun ba rumah,” ku Ripin.

Jelani, 60, madah, penusah ke nuntung sida kena 15 Januari tu tadi udah ngujungka lebih 200 iku peranak rumah panjai nya nadai palan endur diau.

Rumah panjai ke ngembuan 53 pintu nya abis retung laban api urung pukul 3.30 lemai, ti ngujungka sida rugi reta tengkira urung RM300,000.

‘Tu meh penusah angus keterubah endar nuntung kami.

“Dia kami serumah benung ngaga langkau endur ngenduh enda jauh ari palan asal rumah panjai kami ke udah angus nya,” ku iya.

Sama bisi nyempulang Ripin, Hamzah Ibrahim, Eksekutif Komunikasi Korporat Bernas Sarawak Sahrein Maloh enggau Pemancha Wilson Siang.