Kesuahka agi Program Anjung Bestari diatur

0

SERVIS KE RAYAT: Nyuak (kanan) enggau Koh (dua kiba) benung nusun batu bata ba Program Beripai nya seraya dikemata sida ke bukai.

KAPIT: Opis Pamadah Kapit udah mujur ngatur program beripai ba Rumah Manok Manchal, Sungai Yong, apin lama ke udah.

Pemesai Opis Pemadah Kapit Koh Kumbong madah, iya berasai gaga ati meda penyampau tubuh mensia mayuh ke datai ngulu program nya.

“Rumah Manok sebengkah rumah panjai ke udah dipilih Opis Pemadah endur numbuhka Anjung Komuniti Bestari 1 Malaysia ke chukup regas.

“Arapka suah agi Program Anjung Bestari diatur ba taun tu.

“Nengah program tu rayat ulih beratika kebuah perintah bejalaika polisi ke baru kelebih agi bekaul enggau GST enggau sekeda isu bukai,” ku iya.

Ba pengerami nya, Koh mega bisi nerangka isu bekaul enggau chukai servis enggau barang (GST) ke deka diberi kelala ila, enggau sekeda polisi perintah ke bukai.

Rumah Manok sebuah rumah panjai moden Iban ke dientak ba Ulu Sungai Yong, urung 30 minit penyauh ari pasar Kapit ditu.

Bisi bejaku ba pengerami nya mega, Kaban Komiti Besai Parti Rayat Sarawak (PRS)Datuk Kristoffer Nyuak enggau Tuai Rumah Manok Manchal.

Ku Nyuak, iya berasai gaga ati laban ulih betemu sereta berandau enggau semua peranak ba pelilih Sungai Yong.

“Sungai Yong sebengkah pelilih menua ke dibaruh sitak Kunsil Nengeri (DUN) Pelagus. Nya alai, aku ngasaika diri benasit laban ulih betemu enggau peranak menua tu,” ku iya.