Monday, August 10

Empat iku diri menyadi dikemendarka dibai pulai ke M’sia: Rohani

0

KUCHING: Empat iku diri menyadi, iya nya anak dua iku melaki bini peranak Malaysia ti ditan di Sweden dikemendarka dibai pulai ke menua tu, nengah Konvensyen Mengenai Hak Kanak-Kanak (CRC).

Pekara nya dipadahka Menteri Pemansang Orang Indu, Ruang Bilik enggau Raban Bansa, Datuk Seri Rohani Abdul Karim ngagai pengarang berita ditu kemari.

Ku iya, empat iku diri menyadi nya datai di Malaysia pagi kemari ti disempulang ibu sida, ti mega dikemendar nyaga sementara di Malaysia.

“Ditu aku deka nerangka, opis menteri kami endang mekuh ngagai pekara bekaul nyaga sereta ngintu nembiak, laban anak mit endang dibaruh opis menteri kami lebih agi CRC.

“Nya alai bekaul enggau kes di Sweden, empat iku diri menyadi (ti apai indai ditan di Sweden) udah dikemendarka dibai pulai ke Malaysia nengah CRC.

“Enti kitai meda, ba taun 1995 kitai nyain CRC, maya kitai nyain kitai enda nemu kitai begunaka nya, tang diatu nya amat beguna,” ku iya mansutka pekara nya lebuh ti ngenang kaul entara CRC enggau kes di Sweden, dalam aum pengarang berita ti diatur di Sepital Besai Sarawak ditu, pagi kemari.

Konvensyen Mengenai Hak Kanak-Kanak (CRC) iya nya sebengkah konvensyen ti diterima sereta dikena nyauka serata menua ti dibaruh Pertubuhan Bangsa-Bangsa Bersatu nyengkaum Sweden.

Kena 18 Disember 2013, Opis Servis Sosial Sweden  udah ngasuh empat iku diri menyadi anak peranak Malaysia ti ditan di Sweden diau enggau ruang bilik ti ukai pengarap Islam.

Beduduk ari pekara nya, Opis Menteri Luar Nengeri minta penemu Opis Menteri Pemansang Orang Indu, Ruang Bilik enggau Raban Bansa  enggau Opis Pengelantang Pendiau Malaysia bekaul enggau pekara nya ba sebengkah aum ti diatur di Opis Menteri Luar Nengeri kena 22 Januari 2014.

Ku Rohani, bekaul enggau CRC, opis (JKM) beratka Pekara 3 enggau Pekara 20 ti bisi dalam CRC.

“Pekara 3 bekaul enggau ‘The best interest of the child’ enggau Pekara 20 bekaul enggau nembiak bisi kuasa minta dijaga orang bukai ti bisi identiti, jaku, adat enggau main asal ti sama, lebuh hak dijaga apai indai enda dikemendarka.

“Kededua pekara nya chukup dikemerat sereta ngenukuka nembiak nya dijaga enggau ruang bilik bepengarap Islam sereta mai pulai nembiak nya ke Malaysia.

Nambahka nya, ‘insuran sosial’ mega udah disediaka piak kedutaan asil ari penemu enggau lalau ari JKM, ku iya.

“Kami (JKM) dipinta nyendiaka riput berkala nengah Wisma Putra ngagai Opis Servis Sosial Sweden,” ku iya lebuh ti ngenang CRC ti dikena mai pulai empat iku diri menyadi nya kemari.

Dulu ari nya Rohani nyerumba pengerami Taun Baru China ngabas 20 iku orang sakit ba Wad Hematologi Sepital Besai Sarawak (HUS) seraya ngabas seiku tukang gambar surat kabar Utusan Sarawak, Suzanne Empan ti sama ba wad nya.

Iya meri buah sereta ampau ngagai pesakit ba wad nya.

“Aku ngarapka penatai kitai ti ngabas sida ti sakit tu ulih nyadika peransang sereta sukung tauka motivasi ngambika jampat gerai,” ku iya seraya madahka ngabas pangan diri ti sakit di sepital endang ulah dikemeran di Malaysia.