KUCHING: Sapit Menteri Pelajar Malaysia ke dulu suba, Allahyarham Datuk Bujang Ulis, 66 udah selamat dikuburka di Tanah Pendam Islam Semariang, ditu pengudah solat Zuhur kemari.
Niang ninggalka seiku bini, Datin Maimunah Sebli, 58, tujuh iku anak indu umur 12 nyentuk ke 36 taun sereta tiga iku uchu antara dua ngagai tujuh taun.
Niang ke mega ex-Sapit Menteri Perusahaan Utama nyintak seput kepenudi iya di rumah iya empu di Kampung Semariang Jaya, Jalai Bentara ditu tumu pagi kemari.
Nundaku bini niang, laki iya kenu benung meda televisyen maya iya nadai di dalam bilik urung pukul 1.00 pagi.
“Niang benung meda televisyen lalu ngenyit rebah ba aku sebedau aku nya ngasuh kami sebilik besambung ngagai ambulans.
“Datai ambulans, pemesai pengerai ngesahka pemarai iya pukul 1.30 pagi,” ku iya lebuh ke dikerandau di rumah iya sebedau dikubur.
Ku iya baru, niang nadai kala ngidap penyakit balat ngelama tu tang iya nerima pemegi laki iya.
Niang kala gawa nyadi pengajar enggau nyadi prinsipal di beberapa buah sekula di Kuching, Simunjan enggau Mukah sebedau dipadu nyadi Sapit Menteri Pelajar dalam taun 1984 nyentuk ke 1987.
Kelimpah ari nya, niang dipilih nyadi Naib Presiden Parti Pesaka Bumiputera Bersatu (PBB) dalam taun 1983 nyentuk ke iya pansut ari parti nya dalam taun 1986.
Beberapa iku orang ke benama dipeda datai meri basa ke penudi ngagai niang nyengkaum Menteri Muda Pemansang Dagang Bumiputera Datuk Mohd Naroden Majais ke mega Kaban Kunsil Nengeri (ADUN) Simunjan enggau Sapit Menteri Pekara Berumah Datuk Abdul Karim Rahman Hamzah.
Bela datai Sapit Menteri Dagang Temuai Datuk Talib Zulpilip, ex-Yang Dipertua Dewan Negara Tan Sri Ahmad Urai Abang Mohideen, ex-Sapit Kepala Polis Menua Tan Sri Jamil Johari, Chairman Gerempung Nagang Dadah Malaysia (PEMADAM) Nengeri Datuk Paduka Sharifah Mordiah Tuanku Fauzi sereta ADUN Semariang Sharifah Hasidah Sayeed Aman Ghazali.