BESUMPAH MANGKU PENGAWA 28 FEB: Taib (tengah) madah, Kepala Menteri baru Tan Sri Datuk Amar Adenan Satem deka besumpah mangku pengawa nyadi Kepala Menteri baru ba mua Tuai Pemegai Menua (TYT) kena 28 Feb tu.
KUCHING: Kepala Menteri Sarawak ti baru, Tan Sri Datuk Amar Adenan Satem deka besumpah mangku pengawa iya kena 28 Februari tu.
Kepala Menteri ke diatu, Pehin Sri Abdul Taib Mahmud kemari udah betemu enggau Tuai Pemegai Menua, Tuan Yang Terutama (TYT) Tun Muhammad Salahuddin nganjung surat ngelengka pengawa nyadi Kepala Menteri berengkah 28 Februari di Astana Negeri Sarawak.
Pengawa besumpah mangku pengawa nyadi Kepala Menteri baru (Tan Sri Adenan Satem) deka diatur ba mua TYT Tun Muhammad Salahuddin ba hari ke sama.
“Aku baru udah nyuaka surat ngelengka pengawa nyadi Kepala Menteri ngagai Tuai Pemegai Menua belabuh 28 Februari tu. Tuai Pemegai Menua setuju enggau pemutus aku, lalu aku mega berasai gaga ati meda semua pengawa tu bejalai enggau manah.
“Pia mega, aku berasai gaga ati laban bala menteri kabinet aku mega mereti kebuah aku ngelengka pengawa tu, tambah mega mayuh polisi udah digaga sereta bejalai enggau manah, h ku Taib.
Iya madah baka tu ba aum media pengudah betemu enggau Tuai Pemegai Menua bekaul enggau atur nganjung surat ngelengka pengawa nyadi Kepala Menteri, seraya madah ngagai Tuai Pemegai Menua, pangku pengawa Kepala Menteri deka dipegai Tan Sri Adenan Satem.
Enggau pemereti semua menteri kabinet, Taib madah, semua perambu iya deka dipejalaika menteri kabinet ari baruh Kepala Menteri ti baru.
“Raban menteri aku enda mayuh ubah nyerumba aku ngelengka pengawa laban kami udah begulai lama dalam tusah, dalam senang nyau bepuluh taun,” ku iya.
Dalam penegut kaul nya ku iya, tu utai ke ngasuh Sarawak temegah ati laban iya ngayanka pemereti ati entara parti komponen Barisan Nasional (BN) lalu diperansang enggau ati ke seruran deka gawa ke rayat.
“Program pemansang kitai udah bejalai enggau manah ari sebengkah pemansang ngagai sebengkah pemansang, lalu diatu udah datai ba tikas ke tinggi.
“Ba penemu aku, pemerat pemansang kitai di menua pesisir laban agi jauh tinggal ari nengeri lalu ketegal nya pemerat Sarawak sebaka mega enggau sekeda menua di Malaysia deka terus mai pemansang ke bekualiti ngagai tiap pupu raban bansa nyengkaum ngangkatka ekonomi rayat,” ku iya.
Kelimpah ari nya, iya madah enggau pemansang lebih ari 2 juta hektar kebun sawit sereta sukung ari orang asal di menua tu nukar tanah sida iya nyadi estet begempung enggau orang bukai, tanah adat bisi peluang dikemansangka sereta deka meri asil ngagai orang asal.
“Laban tanah adat tu enti enda dikemansang dalam timpuh ke panjai, sayau endar enti enda diputar taja pan mayuh endar penyarut ke nyadi digaga sekeda orang lalu munyi ke perintah deka ngemansangka tanah NCR nya sebengkah pengawa bingkuk.
“Ke bukai nya kami nyerah ngagai rayat empu. Perintah semina ulih merambu kereja besaup ti tau nguntungka pengempu tanah enggau pemaju,” ku iya.
Ba pilih Adenan nyadi Kepala Menteri baru Sarawak kena 28 Februari tu, Taib madah Adenan ngarika tiga iku pengari ti ngemeratka pengangkun baka ke udah diayan kelia.
“Sida iya nemu bakani ulih bepanggai ba pangan diri, ukai semina antara tiga iku menteri ke bisi dichalun nyadi Kepala Menteri tang mega ngagai semua menteri.
“Aku pechaya enggau polisi baka ke diatu ke udah sama dikemansangka kami sebuat ke deka dipangku Adenan, alai Sarawak deka terus nyambung ‘momentum’ tu,” ku iya.
Adenan ada kena 27 Januari 1944 di Kuching lalu naka ke diatu mengkang mangku pengawa Menteri di Opis Kepala Menteri sereta mangku pengawa ‘Menteri Tugas-tugas Khas’ sereta mega nyadi Kaban Kunsil Nengeri (ADUN) Tanjung Datu sereta mangku pengawa nyadi Ketuai Pemadah Parti Pesaka Bumiputera Bersatu (PBB).
Adenan udah bisi ruang bilik ke dikunsi iya enggau Puan Sri Jamilah Anu lalu bisi tiga iku anak, Rafidah, Hayat enggau Aziz.
Iya keterubah besekula di St Joseph School, Kuching lalu nyambung pelajar iya ngambi kos LL.B University of Adelaide (1970).
Dalam pengawa politik, Adenan kala nyadi Penyanding Penemu Undang-undang enggau Kaban Komiti Penyanding Penemu PBB dalam taun 1976.
Kena bulan Januari 1979, Adenan kala bediri di kerusi DUN Muara Tuang ba pengawa bepilih mit (PRK) kena bulan Januari 1979 atas tiket (BN-PBB) lalu ngalahka Razali Sabang (PAJAR) enggau majoriti 2,797 undi.
Bulan September 1979, iya bediri atas tiket (BN-PBB) maya pengawa bepilih besai (PRN), lalu mujur ngalahka Bujang Ali Nor (PAJAR) enggau majoriti 3,422 undi.
Kena 11 September 1983, Adenan dipilih nyadi pemesai (Ahli Majlis Tertinggi) PBB lalu dipadu mangku pengawa nyadi Ketuai pampang Publisiti PBB.
Maya PRN Ke-4, kena bulan Disember 1983, Adenan menang maya nya nyadi ADUN Muara Tuang ke penggal kedua lebuh iya ngalahka Abang Ibrahim Abang Othman (Bebas) enggau majoriti 3,696 undi.
Udah nya maya PRN Ke-5 April 1987, iya sekali agi nyadi ADUN Muara Tuang ke penggal ketiga udah iya teulihka pemenang majoriti 3,441 undi.
Ari taun 1987-1992, Adenan nyadi Mandal Presiden PBB, PRN Ke-6 1991 – Menang enggau majoriti 8,272 undi lalu nyadi ADUN Muara Tuang.
1992-1995 nyadi Mandal Presiden PBB lebuh iya menang di pantai, lalu maya PRN Ke-7 September 1996, iya menang di darat baru lalu mengkang mangku pengawa nyadi ADUN Muara Tuang.
1995 – 1998 – Naib Presiden PBB (menang di darat).
Maya PRU ke-11 di taun 2004, Adenan menang atas tiket (BN-PBB) di kerusi Batang Sadong lebuh iya ngalahka Adam Ahid (PAS) enggau majoriti 9,731 undi.
Maya PRN Mei 2006, iya bediri di kerusi Tanjung Datu lalu menang enggau majoriti 4,136 undi lebuh iya ngalahka chalun PKR.
Kena 3 Mach 2007, iya dipilih nyadi Ketuai pemadah PBB (dipadu), lalu maya PRN Ke-10 April 2011, iya menang kerusi DUN Tanjung Datu lebuh ngalahka chalun Bebas enggau majoriti 3,216.
Peneleba iya ke udah, Adenan kala nyadi pemberita sereta pengajar sekula sebedau iya nyambung pelajar dalam pekara Undang-undang.
Abis pelajar iya, Adenan nyadi Maistret di Kuching (1970 -1972), Penyandig Penemu dalam Pekara Undang-undang (1972 -1974) di ‘Hal Ehwal Petroleum, Kementerian Perusahaan Utama’, Menteri Muda, Pemansang Tanah Sarawak (11Jul 1985), Menteri Muda Pemansang Tanah Sarawak (12 Mach 1987), Menteri Pengawa Rama (10/09/1992), Menteri Betanam Betupi enggau Industri Pemakai ( 01 Januari 1998), Kaban Kabinet Menua (28 September 2001), Ngangkat sumpah nyadi Menteri Rampa Menua enggau Pengeraja Asal (30Mach 2004), Ngelengka pengawa nyadi Menteri Rampa Menua enggau Pengeraja Asal lebuh bisi ubah ba kabinet Sarawak (14 Februari 2006), Penyanding Penemu di Opis Kepala Menteri (2 April 2010 – 06 Jun 2011), dipadu mangku pengawa Penyanding Penemu di Opis Kepala Menteri enggau Menteri Tugas-tugs Khas (6 Jun 2011).
Lalu kena 30 September 2011, iya mengkang megai pengawa Menteri di Opis Kepala Menteri enggau Menteri Tugas-Tugas Khas lalu mayuh ari pengawa iya mutarka pekara bekaul enggau tanah.