Rayat patut meri sukung penuh ngagai ketuai perintah BN dikena ngemujurka tetiap projek pemansang
SRI AMAN: Rayat patut meri sukung penuh ngagai perintah Barisan Nasional (BN) kena ngenukuka pemujur pejalai projek pemansang ba menua tu.
Kaban Kunsil Nengeri (ADUN) Lingga Simoi Peri madah perintah begunaka sukung penuh rayat kena ngemujurka semua perambu projek pemansang.
Ku iya, kerejasama penuh rayat ngemuntangka perintah bejalaika atur pemansang ngambika kitai enda jauh tinggal enti dibanding ari raban bansa bukai di nengeri tu.
“Rayat mega patut landik milih ketuai ke ulih ngemansangka rayat enda ngira ba kandang mengeri tauka menua pesisir,” ku iya bejaku ba Aum Keterubah Parti Pesaka Bumiputera Bersatu (PBB) Pampang Lingga ditu, ensana.
Tandu iya, rayat patut beratika pemujur perintah BN ngemansangka nengeri tu nengah mayuh macham projek pemansang enda ngira mit tauka besai.
“Tu nyengenda endar dipeda semina perintah BN aja ulih mai pemansang ke rayat lalu nadai kebuah rayat ngenggaika pemansang ke dibai perintah BN,” ku iya.
Simoi mai rayat enda mendingka jaku petenah enggau asut penyakal ke dipadahka iya nyadi seiti chara ngulihka undi sinu ngambika nyukung sida (penyakal).
“Kita semuai ulih meda rayat neda ulih dikemelika penyakal ngena mayuh macham chara lalu kitai mega nemu ni bagi ke manah enggau ke jai,” ku tandu iya.