Harden: Kaunsilor ukai semina pending enggau mata perintah tang patut chakah mutarka penanggul rayat

0

FRANCIS HARDEN

SRI AMAN: Menteri Muda Pemansang Menua Pesisir enggau Pengawa Berumah Sarawak, Datuk Francis Harden Hollis arapka kaunsilor ti baru dipadu bejalaika tanggungpengawa enggau manah seraya nyadi mata enggau pending perintah.

Ku iya, kaunsilor ke dipaduka tu patut chakah bejalaika tanggungpengawa lalu suah betemu seraya mendingka penanggul ke ditapi rayat dalam kandang menua ke dipegai sida.

“Tanggungpengawa kita ngulihka semua penerang bekaul enggau sebarang penanggul ke ditapi rayat ba kandang menua ari baruh pegai kitai sebedau ngenataika pekara nya ngagai raban bekuasa tauka pengari rayat ba sitak nya.

“Sekalika kita deka tauka enggai, nya udah tanggungpengawa kita nyadi kaban kaunsil, nya alai kerejasama ti manah enggau opis perintah sereta pengari rayat ke bukai beguna amat,” ku iya.

Iya ke mega Kaban Kunsil Nengeri (ADUN) Simanggang bejaku munyi tu lebuh bejadika atur Besumpah Mangku Pengawa nyadi Chairman enggau Kaban Kaunsil Pelilih Mit Sri Aman (MDSA) ungkup renggat 2014-2015 ba sebengkah hotel ditu, empai lama ke udah.

Ku iya nandu, pengawa nyiri nya ukai basa ari perintah tang sebengkah tanggungpengawa ke berat ti enda tau enda dipejalaika enggau manah kena mutarka penanggul ke ditapi rayat enggau lengkas.

“Tiap iku kaban kaunsil udah tu ila enda tau enda suah agi begulai enggau ejensi perintah betemu, mendingka sereta mutarka penanggul nya,” ku iya.

Berebak enggau nya, Ketuai Opis Kaunsil Pelilih Mit Sri Aman, Richard Tawan Sedu lebuh  bejaku arapka kaban kaunsil lama enggau ke baru meri kerejasama ngagai iya lebuh  bejalaika pengawa sida, udah tu ila.

“Aku arapka 17 iku orang lama enggau 15 iku kaunsilor baru besumpah mangku pengawa ungkup renggat 2014-2015 chakah bejalaika tanggungpengawa sida,” tandu iya.

Sama bisi maya nya, Kaban Parlimen Sri Aman, Masir Kujat, Menteri Muda Betanam Betupi Sarawak (Pemansik enggau Dagang) ke mega Kaban Kunsil Nengeri (ADUN) Bukit Begunan, Datuk Mong Dagang, Residen Pelilih Sri Aman, Jonathan Lugoh, DO Sri Aman, Ismawie Salleh, DO Lubok Antu, Jack Aman Luat enggau sekeda pemesai sereta ketuai bukai.