NYAUP NGELEMPUNG PENUSAH: Kusa (kiba) nyuaka pemeri ngagai TR Lichai (tiga kanan) seraya dikemataka Mauh (dua kiba), Thomas (tiga kiba) enggau bala ke bukai.
SELANGAU: Mensia mayuh ke gerah jari nyuaka bantu besundang ngesah penusah angus ke nuntung Rumah Panjai Lichai Pusong di Sungai Tepus, Ulu Balingian kilah ensana.
Sekeda ari bantu tu datai ari Komuniti 1Malaysia Selangau enggau Komuniti 1Malaysia Sekuau ke bela bisi nyuaka pemeri mata duit RM1,000 ti diarika Stanley Mike Ajah.
Kelimpah ari nya, Palan Servis Parti Rayat Sarawak (PRS) Selangau mega bisi nyuaka bantu RM1,600 enggau Raban Nembiak PRS Tamin nyuaka RM3,400 ti diarika ketuai sida, Kusa Buan.
Komiti Rukun Tetanggga Selangau bela lempung jari nyuaka RM300 lalu ditangkan Komiti Pengelikun enggau Genturung Pendiau (JKKK) Rumah Sigan, RM300.
Kapitan Tiang Kwong Hui mega nyuaka RM320 enggau Gerempung Tuai Rumah Pelagau nyuaka pemeri RM500.
Kelimpah ari nya, sida serumah bisi nerima barang pemakai ari Dali Merawing.
Pengawa nyua bantu nya dikemataka Kaban Kunsil Nengeri (ADUN) Tamin, Datuk Joseph Mauh Ikeh.
Bela bisi datai maya tu iya nya Sekretari Politik ngagai Menteri ba Opis Menteri Besai Datuk Joseph Entulu Belaun, Chumang Nyambong, Pemancha Robert Nanta, Penghulu Thomas Jawa enggau Penghulu Michael Jelani.
Ba penusah ke nyadi pagi 18 Februari tu tadi, Rumah Lichai panjai 16 pintu ke diuan 96 iku peranak ambis angus ke dipelaba bepun ari dapur.