SIBU: Ejensi ti bekaul dipe-ransang chakah agi nyaup pekebun ari menua pesisir ngelakuka produk sida.
Menteri Muda Betanam Betupi (Pemansik enggau Dagang), Datuk Mong Dagang mantaika langgur penemu madah, Opis Dagang Betanam Betupi Perintah Besai (FAMA),ulih numbuhka palan endur ngumpul asil kena nyaup ngelempungka tanggungpengawa pekebun.
“Fama nengah kaul dagang ke manah ulih numbuhka palan ngumpul sereta nyual produk ari pekebun sereta mantu nyual produk nya ngagai pemeli,” ku Mong ke mega Kaban Kunsil Nengeri Bukit Begunan madah ngagai The Borneo Post apin lama ke udah.
Ku iya, ketegal tusah nyual asil tanam sida ngujungka bala pekebun nguna orang tengah.
Iya bejaku munyi tu nyukung penemu Menteri Bumai enggau Industri Betanam Betupi, Datuk Seri Ismail Sabri Yaakob ke meransang bala pekebun, orang berikan enggau betupi nyual asil nya kediri sereta nyeliahka orang tengah, ngambi teulihka untung ke mayuh agi.
Ku Sabri, sekeda ejensi ke bekaul baka Gerempung Pengawa Betanam ‘Farmers’ Organisation Authority’ (LPP), Gerempung Pekebun Nasional ‘National Farmers’ Organisation’ (Nafas) enggau Gerempung Pekebun Kandang Menua ‘Area Farmers’ Organisations’ (AFO) patut chakah mantu raban ke ditagit ngambika sida ulih ngatika diri ba semua tikas sereta enda ngarapka bantu ari perintah.
Mong ke sepenemu enggau menteri nya madah, LPP, AFO enggau Nafas patut bejalaika tanggungpengawa mantu pekebun ba kandang menua sida.
“Penanggul besai ke ditapi pekebun di menua pesisir, sida ukai semina ngemansutka asil ti mayuh tang mar deka nyual produk sida. Nya alai sida nadai chara bukai kelimpah ari ngarapka orang tengah.
“Ba penemu aku, udah datai ba maya LPP, Nafas enggau AFO begempung ngiga chara mutarka penanggul nya,” ku iya.
Lebuh ditanya, sekalika FAMA semina ulih nyaup ngelakuka Terung Dayak Sarawak, ku iya, enti nitihka ukai semina terung aja tang mayuh produk bukai.