BARAM: Peranak menua Long Jegan ke dituntung penusah angus udah nerima bantu ti keterubah kemari ari MP Baram, Anyi Ngau.
Anyi ke datai kia urung pukul 12.00 tengahari ngena kerita 4WD, udah nyuaka bantu RM 10,000.00 ngagai lebih 300 iku peranak menua nya ke udah angus rumah, ba penusah ke nyadi kena Hari Satu tu tadi.
“Kami berasai sinu endar ati meda penusah ke udah nuntung kita. Taja pia, aku ke nyadi pengari rayat ditu begempung enggau Menteri Muda Perengkaguna Mensia Mayuh (Penyambung Ai), Datuk Sylvester Entri Muran enggau naka ulih deka mantu kita ke udah tasah dituntung penusah nya,” pia ku iya ke ke berandau enggau pemberita di Long Jegan ditu kemari.
Anyi mega ngelalau sida anang besalahka pangan diri ketegal penusah nya tang meransang sida beratika penusah nya nyadika sebengkah ajar.
Pengari ari genturung pendiau nya,Henry Kasim, 57, kemari madahka, naka ke diatu sida nadai udah nerima sebarang bantu pemakai tauka gari ari ejensi perintah.
“Diatu, bisi sekeda kami ditu nadai palan endur ngenduh. Kami arapka perintah tauka ejensi ke bekaul mantu kami ditu,” pia ku iya.
Penusah nya udah nyadi urung pukul 1.15 tengahari, kena Hari Satu sereta udah ngeretungka 44 pintu ruang bilik ke diuan lebih 300 iku mensia.
Maya nya, seiku apai enggau anak iya udah betu ba jari, kaki enggau mua ketegal nguji deka ngerara api nya.
Pagi kemari seduai udah dianjung ngagai Sepital Besai Miri ngambika diperubat.