Pemayuh kaban gerempung diatu mengkang bedau nyapai tikas ke dijuluk
KUCHING: Gerempung Dayak Graduate Sarawak (SDGA) merambu nerima raban ke ngembuan setipikit pengelandik ari palan pematih vokasyenal enggau teknikal nyadi kaban gerempung.
Presiden Dr Dusit Jaul madah, perambu nya entara siti chara ti tau dikena nambah penyampau kaban dalam gerempung ti naka ke diatu mengkang bedau nyapai ikas ke dikedeka.
“Kenyau ditumbuh ba taun 2001, penyampau kaban ke udah ngerijister diri dalam SDGA semina 867 lalu penyampau tu jauh ari ikas pemayuh raban graduet Dayak diatu.
“Ketegal pengelandik vokasyenal enggau teknikal udah nyadi sebengkah pekara ti dikemerat diatu, SDGA mega deka nentuka raban bansa Dayak enda tinggal ngembuan pengelandik tu.
“Berindik enggau nya, kitai deka beratika baru konstitusyen SDGA enti kitai dekaka perambu tu dikemujur ke alai kitai pechaya tau nambah penyampau kaban dalam gerempung,” ku iya.
Iya mansutka jaku tu lebuh dikerandau pemberita pengudah bejadi Aum Besai Tiga Taun Sekali (TGM) SDGA ke diatur di siti hotel ditu, kemari.
Konstitusyen SDGA netapka semina orang ke ngembuan diploma tauka tinggi agi ari nya tau diterima masuk nyadi kaban gerempung.
Kesal ketegal kurang nerima sukung ari raban graduate Dayak, Dusit ngarap runding ‘Ngelakka Orang Meh Dulu’ ke udah nyadi penekul SDGA patut enda dikembuan agi.
“SDGA megai tanggung pengawa besai mai isu kelebih agi ba pekara pelajar bansa Dayak ngagai ijinsi ke bekaul.
“Mayuh agi kaban dalam gerempung, terang agi nyawa kitai didinga. Tanggung pengawa tu patut disan lalu dipejalai semua,” ku iya.
Iya nambah, ngembuan runding ‘Ngelakka Orang Meh Dulu’ mai reti ngelakka orang bukai nentuka kuing bansa Dayak ke mega mai reti enda sanggup nyaup raban bukai mutarka penanggul.
“Aram kitai bela angkat lalu nyadi sekeda orang ti bejalaika pengawa ungkup komuniti. Nyadi kaban dalam SDGA ngambika kitai bela nyaup sereta ngiring bansa Dayak mansang kelebih agi ba pekara pelajar,” ku iya.
SDGA netapka bayar RM30 setaun nyadi kaban tauka RM210 sekali bayar.
Pengudah (TGM) kemari, pengawa milih kaban exco baru SDGA diadu dikena nentuka raban ti deka ngiring gerempung ungkup timpuh 3 taun ti deka datai.