Jaku asal suku diri patut dikemerat, ku Hazami

0

KUCHING: Dewan Bahasa dan Pustaka (DBP) Pampang Sarawak benung chakah bejalaika pengawa pemansik sereta ngadu dokumen pasal Jaku Asal Suku Diri peranak nengeri tu ti nyau deka punas kelimpah ari ngetanka jaku ke udah tegap.

Pekara nya dipadahka Pemangku Direktor DBP Pampang Sarawak, Dr. Hazami Jahari dalam aum pengarang berita maya nemuai basa ngagai Menteri Pengintu Pengelantang, Orang Indu enggau Pemansang Ruang Bilik, Datuk Fatimah Abdullah ditu, kemari.

Iya madah, ulah ti tau ngujungka Jaku Asal Bansa Diri punas, bepun ari peranak nengeri empu ti enda ngemeratka jaku asal suku diri nya pesaka asal menua.

“Pemayuh jaku asal di nengeri tu, sereta sekeda jaku asal ti majak deka punas baka Jaku Seru, Jaku Narum (di Marudi), Jaku Sihan (di Belaga), Jaku Ukitan enggau sekeda ke bukai.

“Berindik ari pekara tu, ungkup belanja ari perintah nengeri tebal agi dikena bejalaika projek pemansik bekaul enggau Jaku Asal Bansa Diri ti nyau majak punas, kelimpah ari ngetanka jaku ke endang udah tegap diguna kitai.

“Pemunas jaku asal bansa diri tu ketegal pengempu jaku nya ti bepindah ngagai mengeri, jadi melaki bini tauka betampil enggau bansa bukai ke lalu enda beratka jaku asal diri,” ku iya.

Kelimpah ari nya, Fatimah dalam aum pengarang berita pengudah nerima penemuai basa nya mega madah, di nengeri tu bisi dua buah Palan Penyeridi Anak Mit (Taska) ngajar ngena Jaku Asal Diri iya nya Kelabit enggau Bidayuh.

Nitihku iya, pengajar Taska dilatih sereta diajar nyendiaka perengka tauka kereban pelajar tauka kurikulum, ti dipelanja UNESCO.

Tuju iya endang ngambika rebak baru enggau dudi ulih nampung jaku sereta main asal.

“Dua buah Taska ti ngajar ngena Jaku Asal Bansa Diri iya nya Taska Tawaq Raut di Bario ti ngena Jaku Kelabit enggau Taska Bahasa Warisan, di Penrissen Pelilih Menua Padawan ti ngena Jaku Bidayuh.

“Tuju iya ngambika sida nembiak ti nampung megai menua ulih diajar ari mit ngambika landik bejaku asal sereta ngetanka adat enggau main asal, enggaika punas ngapa.

“Asil ari perati kitai, bala nembiak tu lebih landik sereta jampat nangkap pekara ti diajar lebuh diajar ngeja jaku asal bansa diri,” ku iya.

Nitih penerang Fatimah, projek tauka Taska ti ditumbuh baka tu dikena nyeliahka jaku asal diri pupus dipunka raban bansa Bidayuh lalu ditangkanka bansa Kelabit.