Penyayau, penyinu semua penumpang MH370 dikeingat belama

0

MIRI: Dalam sepuchuk surat, Dr Julian Judson, anak lelaki niang Datuk Dr Judson Sakai Tagal nengah jaku peransang sereta bepenchelapka ati ruang bilik  ke nepan MH 370, kelebih agi Maira Elizabeth enggau ruang bilik kepala  kelasi bilun Andrew Nari ari Sarawak.

Penusah tu nyau deka nyemaka penyadi ke udah ditengah iya enggau sida sebilik semak 10 taun ke udah lebuh sebuah bilun buah engkabang  Bell Long Ranger labuh di tengah kampung tebal lebuh ke terebai ari Bario ngagai Ba’Kelalan di Lawas kena 12 Julai, 2004, nabanka nyawa Menteri Muda Sarawak di Opis Kepala Menteri Datuk Dr Judson Tagal, lima iku ke bukai sama enggau pilot.

Pengawa begiga enggau nyelamat ngambi timpuh 17 hari baru temu tempat ke alai bilun nya labuh lalu sehari datai kia ngagai penumpang ke parai dia, nguyat pengidup sida sebilik.

Iya enggau empat iku menyadi indu iya benung besekula maya penusah tu nyadi, lalu diatu semua udah graduet kelimpah ari seiku ke baru tembu A-level ngembuan juluk ati deka nyadi arkitek. Dr Julian, apai seiku anak lelaki, gawa nyadi Ophthalmologist ba Hospital Besai Sarawak.

Dr Julian enchuri jam iya dikena nawatka surat tu: “Maya aku nulis lambar surat tu, kena 27 March 2014, sekeda bilun enggau kapal  benung matau sebengkah kandang menua pemesai 154 batu pesegi di Tasik Hindi, 1,500 batu ari Perth, ba koordinat 90 ( 25’ 19.20” E, 44( 41’ 24” S.

Tuju sida: deka ngabas sempiar ba padang tasik urung 120 bengkah utai melepung, pengabis besai nya 75 kaki pemesai.

Nama meh sempiar nya: sempiar ari MH370, penerebai bilun ngagai Beijing kena 8 March ke lalu enda sangkai.

Aku enda kala tinggal berita sekumbang utai tu nyadi lalu meruan nyadi topik dikerandau enggau bakih sereta bakih sepengawa kenyau ari tiga minggu ke udah.

Udah nya, berita ke balat ngenyinuka ati diterima kena 24 March ke dibantai Menteri Besai Datuk Seri Najib Tun Razak. Bepelasarka satellite, penasat madahka pengujung MH370 udah tembu pejalai terengkah ba Tasik Hindi.

Aku ngasaika penyinu sereta pengusung runding laban apai aku empu, Dr. Judson Tagal, ke dikesayau labuh nepan bilun engkabang ke nabanka nyawa iya enggau tujuh iku ke bukai ba atas lebak Ba’ Kelalan.

Bilun nya semina temu komando VAT 69 18 hari udah nya. Seraya nya kami sebilik enggau peranak Sarawak sama bekunsika penyinu udah nya mayuh bengkah aktiviti dipejalaika, rabat enggau nerima pesan sinu ati.

Enggau chara ke sama, aku ngenataika penyinu ati ngagai ruang bilik ke nepan MH370, ngagai ruang bilik Kepala Kelasi bilun nya, Andrew Nari, kelebih agi ngagai Maira Elizabeth enggau tu -nuan enda kediri dalam penusah ati.

‘Kami sama bekunsika penyinu ati enggau nuan dalam maya penusah tu, kami minta ampun taja pan mayuh bengkah daya udah digaga tim penyelamat tang bedau bisi pengujung. Kami semampai ngingatka nuan enggau orang kesayau ke udah lebang dalam sampi kami, kami minta Tuhan mai pemaik iya seruran ngangkatka kita maya kediatu.

Ingatka sida, dalam chara seiku bakih apai aku ngingatka iya.

“Judson, diatu nuan diambi ari kami, kami lelengau ke nuan dalam ati kami ensiban. Kami lelengau ke nuan di Bario, kami lelengau ke nuan di Pa’ Lungan, kami lelengau ke nuan di Ba’ Kelalan, lalu kami lelengau ke nuan di semua tempat bukai ba selepak munggu enggau bukit ba tanah tinggi ditu.

Kami lelengau deka nuan tuchum, ninga jaku tundi, ketawa nuan.

Ingatka maya kitai nurun begiga, merau ngagai menua ulu nengah wong neresa ai terejun.

Ingat mega maya kitai ke bemain golf lebuh nuan bulih par tauka birdie.

Kami semampai ingatka ketawa enggau pengaga ati nuan’ Ingatka semua utai nya”.