KUCHING: Bekaul enggau penusah angus sepital besai (HUS) apin lama tu tadi, Opis Pengelikun enggau Pengerai (OSHA) diberi kuasa mansik kebuah penyadi nya.
Menteri Kereja Raya Malaysia (KKM) Datuk Fadillah Yusuf madah, kebuah sebagi ari HUS nya angus, pengawa nasat kebuah nya patut dipejalaika opis nya, lalu iya patut ditutup dulu dataika opis nya udah nasat enggau silik, lalu udah nya, berundingka utai ke patut dipejalai nangkan nya.
“Naka diatu, sebarang pemutus bedau digaga tang taja pia, opis kami (KKM) beratika pekara dataika asil tasat nya udah dipejalai, lalu madah ni maya pengawa ngaga sebagi ari sepital nya ulih sambung baru,” ku iya, lalu nambah pemerat KKM semina nganti asil tasat OSHA, lalu pemerat bukai ba projek nya baruh tanggungpengawa Opis Menteri Pengereja Pengawa baruh pegai menteri opis nya, Dato Sri Richard Riot.
Iya nandu, asil pansik udah tembu lalu semina ngambi sekeda atur dalam bidang kuasa sida iya aja.
“Aku enda ulih nimbal bidang kuasa ke digaga OSHA…Kami semina beratika atur nangkan nya.
“Enti ari asil tasat nya ila ketegal ari kunteriktor, kami deka ngambi atur ba kunteriktor nya laban ba sentang tu, iya baruh bidang kuasa opis CIDB (Contractors’ Industrial Development Board) enggau CIDM- ‘Centre for Information-Development’ kunteriktor tu dirijista baruh opis menteri kami…Nya bidang kuasa kami.
“Nya alai, nyambung pengawa ngaga sebagi ari sepital nya baru, nganti dikemendar ulih OSHA,” ku Fadillah.
Iya madah baka tu pengudah bejadika atur pengawa ‘Karnival Fiesta Mesra Belia 1Malaysia di Kompleks Sukan Satok ditu, kemari ti diatur Kelab Sukan Satok (KSS) begulai enggau Opis Nembiak enggau Lumba Sarawak (JBSS).
Ba atur pengawa nya kemari, iya madah rebak nembiak kemaya hari tu dilalau sereta diperansang ngereja aktiviti ke postif, ke deka meri penguntung ngagai bala nembiak.
Fadillah ti mega Kaban Parlimen (MP) Petra Jaya madah, kebuah Perintah ngaga mayuh perengka guna ke bala nembiak di menua tu, laban deka meda rayat kelebih agi bala nembiak ngembuan pendiau ke bepengerai sereta chikar dalam runding sida iya.
“Laban kitai begunaka nembiak ke deka nyadi pemesai ukai semina dalam ruang bilik, komuiti tang dalam pekara pemansang menua tu jemah ila, enda ngira ni bagi pengawa pemansang kedeka sida iya baik iya politik, komuniti, ekonomi, gawa ba opis perintah, korporat enggau sekeda pekara bukai.
“Kiti begunaka modal mensia, rebak baru ke bepenemu sereta bepengelandik. Nya kebuah kitai patut ngelatih sida iya ari umur sida iya biak,” ku iya.
Nya alai ku iya, ngelatih nembiak nyadi nembiak ke bepengelandik sereta bepenemu begunaka bantu ari tiap renggat komuniti kitai, lalu ukai semina diri sebilik aja tang ari gerempung korporat enggau Perintah,ku iya.
“Nembiak ke kreatif sereta inovatif dalam ngemansangka pengawa ke dikerindu sida iya tau mai penguntung ngagai sida iya empu.
Ambika chunto, baka bala nembiak ke bisi pengerindu dalam pekara ke bisi bekaul enggau kerita, tau meri penguntung ngagai sida iya.
“Kreativiti sida iya tau dijual ngulihka pemisi sida iya empu. Enti suba menua kitai semina ngereja pengawa betanam betupi aja, tang diatu kitai enda ulih ngarapka ekonomi bansa nya agi…Kitai patut ngerembaika ekonomi kitai ukai semina di menua tu aja tang ba renggat global,” ku iya lalu nambah ekonomi diatu bepelasarka kreativiti enggau inovasi, ekonomi ke bepelasarka penemu enggau pengelandik.
Ba atur pengawa nya mega, Fadillah ngungkupka RM250,000 kena nembuka kompleks lumba enggau main di pampang Satok nya, alai kos nya ila deka dikena ngaga perabung kompleks nya, nyambung wayar karan sereta pengawa injinir lalu dijangka tembu dalam kandang taun tu empu.
Sama bisi ngulu atur pengawa nya kemari, Ketuai Nembiak Parti Pesaka Bumiputera Bersatu (PBB) pampang Satok, ti mega chairman pengatur atur pengawa nya, Iskandar Sharkawi enggau Sapit Direktor JBSS.