Hari Besai nadai nanggul ngereja pengawa: Nanta

0

Taja sehari nya Hari Besai Paska, Nanta ti sempulang pemesai ejensi opis perintah ngelawa Rh Gaing ke betapi tanah tusur

KAPIT: Sapit Menteri Pemansang Menua Pesisir enggau Kandang Menua, Datuk Alexander Nanta Linggi udah nemuai ngagai Rumah Gaing Bangkong di Nanga Baleh empai lama ke udah.

Rumah Gaing ke penyauh urung 15 minit pejalai ngena bot laju ari ulu pasar Kapit diatu betapi enggau penusah tanah tusur ketegal musin pengujan bulan November enggau Disember taun nyin tadi.

Pekara ti balat ngenusahka diatu iya nya, tanah berengkah tusur ba tisi rumah panjai ke baru digaga peranak menua nya, udah tembu urung 50 peratus ba endur ke sama udah ngujungka sekeda ari dinding enggau lantai semin rumah panjai nya merekah nganti rubuh.

Lebuh berandau enggau peranak Rumah Gaing, Iya meri terima kasih ngagai semua ejensi perintah ke udah nyempulang iya nemuai kia, taja pan sehari nya ukai hari orang gawa ketegal ngintu Hari Paska (Good Friday).

“Tu mandangka pemanah gempung entara ejensi perintah enggau pengari rayat sereta ketuai politik di menua tu,” ku Alexander.

Lebuh bejaku ba mua peranak rumah panjai nya, iya madah, tiap iku Kaban Parlimen diberi ungkup belanja RM5 miliun ngambika bisi disadung ngagai rayat, nitihka pemerat guna sida. Tandu iya, ungkup belanja nya mega diberi ngagai orang ti beguna nitihka padah ari sekeda ejensi perintah.

Nengah awak nya, Alexander bisi nyuaka geran  RM30,000 ngagai JKKK Rumah Gaing, ke mega bantu ngenyit ngagai peranak rumah panjai nya. Kelimpah ari nya, iya mega nyanggup mantu sida ngerataka baru palan endur berumah ti beungkus RM150,000.

Iya arapka Opis Kereja Raya ulih meresa palan nya enggau lengkas sereta merambu ungkus dikena ngerataka palan nya.

Rumah Gaing udah dituntung penusah angus dalam taun 2011. Pengudah nya penusah nya nyadi, Alexander bisi meri geran RM32,000 ke mega bantu ngenyit ngagai sida maya nya suba.

Bela bisi nyempulang Alexander lebuh nemuai nya, Sekretari Politik Kepala Menteri Sarawak, Jefferson Jamit Unyat, SAO, Vanessa Joseph ngarika DO Kapit, Pemesai Opis Pengerara Api enggau Penyah Penusah Erwandy Tugor; Pengari Supritenden Opis Tanah enggau Survei, Rusdan Abas; pengari ari sekeda opis perintah baka Opis Pengintu Pengelantang Pendiau, Kaunsil Pelilih Mit Kapit (KDC), Polis, Opis Pengerai, Opis Penerang enggau JASA.

Enda tinggal mega Pengulu Enggin Nyipa enggau sekeda bala ketuai raban bansa.