KUCHING: Pengelandik sereta pemandai peranak menua tu patut dikemerat maya milih pengereja pengawa kena nyeliah Sarawak terus bepanggai ba pengereja pengawa.
Chairman Parti Tindakan Demokratik Sarawak (DAP) Chong Chieng Jen madah pemayuh gaji ke diberi ngagai seiku ekspatriat (orang ari menua luar ke diambi ngereja pengawa profesyenal di menua tu) tauka orang ari menua luar ke bepengelandik tau dikena ngupah mayuh agi orang ari menua tu empu ke sama bisi pengelandik bansa nya.
Iya madah, ambika chunto baka di opis Sarawak Energy Berhad (SEB), diatu sida iya bisi urung 4,000 pengereja pengawa di kompeni nya, lalu ari pemayuh nya, urung enam iku ekspatriat dibayar nyauka RM10 juta setaun.
“Enggau penyampau RM10 juta setaun nya, Perintah Menua tu ulih ngaji 100 iku rayat Sarawak enggau penyampau gaji setaun RM100,000 seiku. Enti nitih, rayat Sarawak ngembuan mayuh agi pengelandik ari enam iku ekspatriat nya.
“Pekara ke berat ba Perintah Barisan Nasional (BN), sida iya selalu madah ‘Sarawak ke rayat Sarawak’ tang ngambi ekspatriat tu enda nunda utai ku sida,” ku Chong madah baa um media di Indu Opis DAP menua ditu, kemari.
Ba pekara ngumpul sain mensia mayuh minta atur kuasa elektrik setipak agi digaga di menua tu, ti dipunka kena 28 Januari 2014, Chong madah, iya ukai kebuah mayuh pengereja pengawa di SEB dibuai kereja.
Chong ti mega nyadi Kaban Parlimen Bandar Kuching ti mega Kaban Kunsil Nengeri (ADUN) Kota Sentosa nya madah kena beratika pengerja pengawa di SEB ngelaban inisiatif DAP nya, SEB mansutka bup mit.
“Entara pekara ke ditulis dalam bup mit nya, iya nya ‘SEB nyadi kompeni menua ti ke pengabis besai sereta ngaji urung 4,000 iku pengereja pengawa, iya nya pekara ke ngelantangka ati….Enti tarif (elekterik) dikurangka, mayuh deka dibuai ari pengawa sida iya’.
“Enti DAP mujur dalam kimpin tu, orang ke enda diberi pengawa agi ila, iya nya Ketuai Pegawai Eksekutif kompeni nya, iya nya seiku rayat Norway, ke nerima gaji setaun iya nyengkaum elawin lebih ari RM4.5 juta setaun lalu nyangka ekspatriat bukai ke nerima gaji sereta elawin bukai nyauka RM1 juta seiku setaun,” ku iya.
Chong mega madahka iya udah besedia betemu enggau menteri betanggungjawab enggau Ketuai Pegawai Eksekutif (CEO) SEB bekait enggau pekara wang kompeni nya, enti tariff elektrik dikurangka datai ngagai 30 peratus.