Saturday, October 1

Tebal kaban Wanita enggau Pemuda SPDP nguing

0

Dikarang Jacqueline David //

Bisi 15,263 kaban sida ari pampang Selatan nguingka sukung ngagai TERAS kemari: Olivia Chan

KUCHING: Urung 15,263 raban Wanita enggau Pemuda pampang Selatan Parti Demokratik Progresif Sarawak (SPDP) ningkilka diri ari parti nya belabuh ari seharitu (kemari).

Ari penyampau nya, 10 ari 16 pampang Selatan Wanita betuaika ex-sekretari Wanita SPDP, Olivia Chan ke mungkur urung 10,000 kaban Wanita (ari 41,000 iku indu) ke ngarika dua ari tiga (2/3) ningkilka diri ari SPDP lalu udah madahka diri deka begempung enggau TERAS (Parti Tenaga Rakyat Sarawak) betuaika ex-presiden SPDP Tan Sri William Mawan Ikom.

Lalu ba sepiak Pemuda betuaika ex-Ketuai Pemuda Khairuddin Abdul Kadir, ngarika 16 pampang selatan mungkur 5,263 kaban Pemuda sama ningkilka diri ari SPDP lalu begempung enggau TERAS.

Kededua Wanita enggau Pemuda deka nganjung surat ningkilka diri ngagai SPDP enda lama agi sebedau sida iya nganjung nama begempung enggau TERAS.

“Kami Wanita ngarika pampang Pending, Batu Lintang, Satok, Muara Tuang, Bengoh, Tarat, Opar, Tanjung Datu, Kedup enggau Tebedu sama setuju ningkilka diri ari SPDP lalu deka begempung enggau TERAS,” ku Chan.

TERAS digempung kena 15 Mei tu tadi maya ex-presiden, Mawan ti mega Menteri Pengawa Rama ngaga Aum Media pengudah Aum Kunsil Nengeri (DUN) di Bilik Media DUN maya nya.

Berindik ari nya, TERAS ke bedau nerima surat diterima dalam komponen Barisan Nasional\(BN) menua, tang TERAS disambut enggau manah ulih Perintah Menua nyengkaum Kepala Menteri empu, Tan Sri Datuk Amar Adenan Satem.

Entara pemesai bukai ke sama bisi masuk TERAS, iya nya ex-Parti Sa’ati Rayat Sarawak (SUPP), Dato Sri Wong Soon Koh, Datuk Dr. Jerip Susil, Johnichal Rayong Ngipa, Ranum Mina, lalu ari parti SWP George Lagong enggau ex-SPDP empu, Datuk Peter Nansian, Datuk Sylvester Entrie, Rosey Yunus, enggau Paulus Palu Ngumbang.

Chan nandu, kaban SPDP ari pampang utara dijangka deka ngaga pekara ke sama, ningkilka diri ari parti nya belabuh ari pagila (Hari Satu).