Sida tu minta kami masuk Islam tang enda ngasuh kami muai adat sereta pengidup lama
KAPIT: Peranak Rumah Along Anak Asong di Nanga Majau, Sungai Mujong mantaika penesal sereta sebana diri laban ke udah teparuk singkang mekuh pengarap Islam kenyau bulan November 2013 suba.
Berindik ari nya, sida ngasaika diri udah saru runding sereta balat endar nesal ketegal udah teparuk sereta tekelanjur pengawa.
Kenyau berapa bulan udah mekuh pengarap Islam baru sida ngasaika diri dikemula seraban temuai ke niki ngagai rumah panjai lalu ngasuh sida masuk Islam.
Diatu sida deka mutar mansutka diri ari pengarap Islam sereta pulai nyadi orang Keristin (Methodist) baru baka ke suba.
Ketegal pemerat pekara nya, Tuai Rumah Along Asong undur ari Nanga Majau ke Kapit betemu enggau Menteri Pemansang Tanah, Tan Sri Dr James Jemut Masing di Hotel Meligai ditu kena Hari Enam Minggu nyin minta lalau sereta singkang nangkan nya.
Udah nya, Tuai Rumah Along enggau sekeda peranak rumah panjai iya lalu ngaga aum enggau media nyeritaka semua pekara ke udah nyadi.
“Kami dipinta masuk pengarap Islam kena 24 November 2013 lebuh seraban 20 iku Ustaz enggau Ustazah ari Johor, Kuala Lumpur, Kuching enggau Kapit niki ke rumah panjai kami.
“Maya nya sida besemaya deka meri mata duit RM100, pemakai enggau gari enti kami ngerijista diri enggau sida. Lebuh ngerijista nya, sida udah minta Kad Pengelala kami. Ku sida, udah masuk nyadi Islam, chara pengidup mengkang sama lalu kami mega dikemendar bejalaika adat enggau gaya pengidup baka Iban selama. Sida mega nadai nagang kami makai babi,” ku Tuai Rumah Along.
“Tembu pengawa nya, sida bekejang ari rumah panjai kami kena 25 November 2013, sida lalu nadai nikal ngabas kami. Berengkah ari nya kami ngasaika diri ngaga penyilap lebih agi lebuh bala kaban belayan ke ari pasar mulaika diri ke rumah panjai, madahka pengawa kami nya salah.
Raban 20 iku Ustaz enggau Ustazah ke netapka kami masuk batang pengarap Islam iya nya, Haji Mohd Chathazaman, Ustaz Osman Bujang, Haji Abdul Rahman, Hussein Mustaffa, Idris Ahmad, Sulaiman, Ahmad Zaki, Nazan Wahad, Wan Raifizan, Ivurul Safiyna, Johari Bujang, Awang Syamal, Syamal, Norehan, Dayang Norejaing, Samsuddin, Ezamuddin, Latiffah enggau Ismail Ibrahim.
“Berengkah ari nya, kami berasai enda lantang ati nyengkaum aku empu (tuai rumah) enggau bala JKKK suah nguji deka betemu enggau Tan Sri Datuk Amar Dr James Jemut Masing ngambika ulih meri jaku lalau ngagai kami. Kami mega bisi betanyaka penemu ba PRS Kapit senentang pekara nya,” ku Tuai Rumah Along
Pengudah ningaka sekeda jaku lalau, kami baum lalu mutus ati ngaga aum enggau media madahka kami enggai mekuh pengarap Islam agi sereta mulaika diri nyadi orang Keristin ke endang udah lama dititihka aki ini kami suba.
Rumah Along bisi 18 pintu sereta diuan 150 iku mensia.
Menteri Pemansang Tanah, Tan Sri Datuk Amar Dr James Jemut Masing lebuh ke dipinta ngenang senentang pekara nya ngelalau rayat bejejimat sereta berunding dedalam sebedau ngambi pemutus deka mekuh pengarap bukai.
Ku iya, mudah mekuh batang pengarap bukai tang udah nya napi macham penanggul.
“Di Malaysia, kitai nadai ditagang mekuh jalai pengarap bukai, tang baka penanggul ke nyadi ba peranak Rh Along semina nengah sebengkah jalai aja, sepatut bisi dua jalai. Enti kitai dikemendarka tama, kitai mega patut dikemendar pansut nitihka peneka diri. Nya alai, berunding pepanjai sebedau ngaga sebarang pemutus. Sekali tu, pekara tu nyadi ba peranak Rumah Along, tang kitai enda nemu dudi ila rumah panjai bukai ke diining sida,” pia ku iya.