SEBUYAU: Tetiap bengkah pengerami ti diintu semua pupu bansa di menua tu ulih nyadika pelasar dikena ngemujurka juluk 1 Malaysia baka ti diperansang Menteri Besai, pia ku Menteri Pemansang Orang Indu, Ruang Bilik enggau Raban Bansa Datuk Rohani Abdul Karim.
Nitihku iya, endang patut tiap bengkah pengerami diintu begulai enda ngira sekalika di Sarawak, Sabah tauka di Semenanjung Malaysia.
“Kitai ngabang ngagai pangan diri, kaban belayan, orang sepiak rumah tauka bilik kitai enda ngira peninggi pangkat enggau jalai pengarap,” ku iya ba pengerami Ngiling Tikai ti diatur ba Balai Mensia Mayuh Genturung Pendiau Sungai Lumut, Sebangan, Sebuyau apin lama ke udah.
Rohani ke mega Kaban Parlimen Batang Lupar madahka pengawa ngabang ngagai pangan diri sebengkah ari adat tauka penyelai ti patut dikemeran belama ngambika semua rayat ulih idup dalam pemaik enggau pengelantang.
“Penyerakup rayat pupu bansa beguna amat ba kitai ngambika terus maju. Baka ke ditemu semua, Sarawak diuan mayuh bengkah pupu bansa.
“Semua bansa diberi peluang ti sama lalu pekara ti dikearapka aku iya nya penyerakup ke diasaika kitai seharitu ukai datai tekala nya sereta patut ditanka.
“Nya alai, penyereta ari opis , ejensi perintah enggau gerempung ukai dikuasa perintah (NGO) ti bepengelandik ngatur atur pengawa ti ngemeratka penyerakup beguna amat, ngambika penyerakup menua ulih ditan sereta ditegapka agi,” ku iya.
Ba pengerami nya Rohani nyuaka geran perintah ke sama bela penyampau RM5,000 ngagai 10 buah Komiti Pemansang enggau Pengelikun Genturung Pendiau (JKKK) di sebuayu sereta Genturung Pendiau Sungai Lumut.
Bela bisi ngulu pengerami nya, Sapit Direktor KASTAM Sarawak Abdul Karim Wahab, Kaunsilor Asli Yahya, Pengulu Merum Babu, Pengulu Kendawang Ruik, Pengulu Hamdan Esamail sereta Tuai Rumah Genturung Pendiau Sungai Lumut, Tuai Rumah Nillie Ranggu.