Dikarang Jacqueline David //
Sitak Dalat ke mayuh pengurang ba penyikap infrastruktur ngarapka ungkup besai agi ari atur belanja nya
KUCHING: Menteri Pengintu Pengelantang Pendiau, Orang Indu enggau Pemansang Diri Sebilik (KKWPK) Datuk Fatimah Abdullah madah, iya ngemeratka pemansang ba sitak Kaunsil Nengeri (DUN) Dalat seraya ngarapka mayuh agi ungkup ba Bajet 2015 tu.
“Keterubah sitak endur aku, Dalat, agi mayuh endur ke nadai penyikap baka jalai, karan enggau bekal ai beresi.
“Menua pesisir baka Dalat enda ulih bida enggau kandang mengeri laban di Dalat agi mayuh pengurang, kelebih agi ba penyikap infrastruktur,” ku Fatimah madah lebuh dirandau pasal Bajet 2015 pengudah nyadi chairperson aum media bekaul enggau ‘Konvensyen Pendidikan Pra-Sekolah’ (KPPS) Siri ke-9 Tahun 2014’ ti deka diatur berengkah 10 nyentuk 12 Oktober tu.
Nya alai, ku iya, dikarapka Bajet 2015 tu deka meri mayuh agi ungkup ke pemansang menua pesisir.
Taja pia, iya madah, enti bisi bajet lebih mega, chukup manah enti ulih nyambung internet ngagai menua pesisir.
“Bala nembiak nyangka kelia agi diau di menua pesisir, enda kiruh bisi internet tauka nadai. Tang udah sida iya belabuh gawa di nengeri lalu udah nya, pulai ke menua lebuh bisi pengerami, maya nya sida iya deka ngena internet…Nya alai, perengka penyambung baka internet mega berat ba kami di Dalat,” ku iya.
Lalu baka nya mega enggau sekula di menua pesisir, sekeda sekula sigi patut digaga manah agi laban udah kelalu jai.
“Nya alai bajet ti diberi Perintah Besai ninting taun nya chukup tauka enda, bepanggai ba peneka kitai.
“Setindit udah berubah, nyangka penyampau ti diberi taun nyin tadi enda sebaka enggau taun tu. Ku kitai penyampau ti diberi suba chukup tang diatu penyampau ke sebaka enda chukup agi. Kualiti pendiau udah berubah lalu baka nya mega enggau kos,” ku iya.
Kelimpah ari nya, iya madah opis menteri iya mega ngemeratka bajet ti deka diungkupka ke opis menteri nya nengah Bajet 2015 ti deka dibantaika Menteri Besai Datuk Seri Najib Tun Razak, Hari Lima tu.
“Opis menteri kami tu aja nyaga Pengelantang Pendiau, Orang Indu enggau Pemansang Diri Sebilik, lalu kelimpah ari nya beratika Opis Pelajar Nengeri (JPNS), Dewan Bahasa enggau Pemun Pelajar Anak Mit. Kitai pan deka meda penguntung ti di ulih orang ke dijaga opis menteri tu.,” ku iya.
Iya madah baka penyerta E-Kasih baruh program 1AZAM dikarap ulih mantu urung 3,750 orang seranta, lalu ngelalau sida iya ngerijista diri enggau E-Kasih ngambika ulih nyaup ngelatih sida ngulihka pemisi diri lalu diberi perengka ke ulih dikena sida iya bedagang.
“KKWPK ngarapka ulih munaska penyeranta ba raban sida tu,” ku iya.