Piak ti bekuasa dipinta mutarka penanggul jalai rusak, sekut

0

BALAT SEKUT: Tu mih gaya Jalai Tudan Lutong By-Pass ke balat sekut ninting hari.

MIRI: Beribu iku mensia ke nengah jalai Tudan-Lutong By-pass napi sebengkah penanggul ke udu ngachau pemujur pejalai kerita darat ke betengahka jalai nya kelebih agi lebuh maya mensia pulai gawa.

Berindik ari penusah nya, Opis Kereja Raya dipinta bejalalaika pengawa sida mutarka penanggul ke nuntung rayat ke nguna jalai nya.

Nitihka penerang ke bisi diterima, ke ngujungka jalai nya udu sekut laban ngembuan sebengkah polikelinik enggau sebuah sekula (SK Tudan) ke bepalan ba tisi jalai nya.

Jalai ke udu sekut tu dipeda seruran nyadi urung pukul 7.00 ngagai 10.00 pagi, 12.00 ngagai 1.30 tengah hari sereta urung pukul 4.30 nyentuk ngagai pukul 6.30 lemai ninting hari.

Seiku penguna ke nengah jalai nya ninting hari, Abdul Malik Said madah, jalai ke ngembuan seiti lurung nya diatu udu sekut sereta enda likun ditengah mensia.

Berindik ari penanggul nya, mensia mayuh ke nguna jalai nya minta raban ejensi ke patut nyengkaum pengari rayat ke megai pelilih menua nya bejalaika pengawa sida mutarka penusah nya enggau lengkas laban jalai nya ditengah mayuh mensia ke nurun gawa di sekeda menua baka Lutong, Kuala Baram enggau Miri.

“Jalai tu chukup balat sekut sereta kerita darat ke nengah jalai tu nyau majak nambah sereta patut diputarka enggau lengkas penusah tu awakka mensia mayuh ke nengah jalai tu enda napi penusah jalai sekut laban kerita darat,” ku Malik.

Malik, 50 taun, mansutka penemu nya lebuh  ditanya raban pemberita ari ‘The Borneo Post’, kemari.

Nangkanka nya, Malik mega madah, jalai nya udu sekut enti lebuh bisi penusah bebadi jalai alun nyadi sereta mensia mayuh ke nengah jalai nya napi penusah laun datai ba rumah.

Jalai Tudan-Lutong By-pass tu mega ngembuan jalai ke udu belubang ti ulih ngeruga pengelikun enggau pengelantang mensia mayuh ke nengah jalai nya.

Seiku peranak menua nya Yee Fook Lok, 52, madah, jalai ke udu rusak nya patut dikemanah enggau lengkas dikena ngemujurka pejalai mensia mayuh ke nguna jalai nya kelebih agi sida ke diau di Tudan, Permyjaya sereta sekeda endur ke semak dia.

“Enti penanggul tu enda diputarka enggau lengkas, kitai anang teperasa ati meda mayuh macham penusah bukai nyadi berindik ari penusah jalai sekut sereta rusak tu.

Nya alai, mayuh pemanah deka dikembuan enti sema jalai dua lurung disediaka ungkup rayat di pelilih menua tu,” ku iya.

Ukai semina besemaya maya bepilih besai aja, jalai alun ke diguna mensia mayuh mega patut dikemanah sereta seruran ngemeratka pengelikun semua mensia belama.