Dikarang Judan Bungap //
NGELAI PENGAWA: Jambai (kiba) dibantu Mawang seraya dikemata Khairuddin nanam pun buah maya Program Jiwa Murni Sekolah Kebangsaan (SK) Saint Matthew, Sekuau, kemari.
MARKAS 9 Briged deka ngatur Program Jiwa Murni ba empat bbuah sekula primari di Selangau ti bisi napi penanggul ba pengawa betukang tauka penyampau tubuh ngereja pengawa.
Program tu dulu agi diatur ba Sekolah Kebangsaan (SK) Saint Matthew, Sekuau, kemari, sebedau ditandu ba sekula bukai.
Ketuai Staff Markas 9 Briged Leftenan Kolonel Khairuddin Zakaria dipebasa ngarika Panglima 9 Briged Brigedier Jeneral Dato Muhamad Daniel Abdullah bejadika program nya.
Bela bisi datai maya tu iya nya Pemesai Opis Pelajar Selangau Jambai Sayong, Kepala Pengajar Saint Matthew Mawang Nili, Kepala Pengajar SK Penghulu Imban Andrew Sirai Benang, Chairman Gerempung Apai Indai enggau Nembiak (PIBG) Sk Saint Matthew Pengiran Sago enggau bala apai indai nembiak.
Sekeda ari pengawa ke bisi diatur maya tu baka baka nebas kandang sekula, ngaga parit panjai 400 meter enggau ngaduka jamban nembiak sekula lalu diperambu deka tembu dalam kandang dua hari nyengkaum kemari.
Program tu deka ditandu ba SK Saint Mark udah tu ila sebedau diatur ba SK Nanga Tajam lalu kepenudi ba SK Penghulu Imban.
Ba SK Saint Mark, pengawa ngaga jematan enggau jelatung sekula deka diatur dalam kandang seminggu
BESAUP: Bala apai indai nembiak enggau raban soldadu besaup ngemanahka agi jamban sekula.
Sebedau tu, nembiak ke berundang sekula ninting hari berasai enda likun laban tangga jelatung mega udah balat jai.
Jematan baru ke deka digaga nya nyambung jelatung ngagai langkau alai nganti.
Ba SK Nanga Tajam, pengawa ngaga panggau ba balai mensia mayuh sekula nya deka diatur.
Ngelama tu sekula nya empai bisi panggau alai ngatur pengerami tauka program ti bekaul.
Kelimpah ari nya, raban soldadu ke ngulu program tu mega deka ngaga platform tauka ngaga panggau alai nembiak tinduk ba buding sekula.
Sebedau tu nembiak tinduk malai ba papan.
Nambahka nya, 100 iti tilam mega deka diberi ngagai nembiak sekula.
Program tu deka ditandu enggau pengawa nganti perabung rumah sekula ba SK Penghulu Imban.
Program Jiwa Murni sebedau tu semina diatur ba rumah panjai lalu tu meh keterubah iya program tu diatur di sekula primeri.
Program tu mega deka diatur ba Rumah Patrick Libau di Miri enda lama agi.
BELAJAR ENGGAU BENDAR: Sekeda ari nembiak SK Saint Matthew.