Penembu jalai alun Kapit/Song/Kanowit deka ngelantangka peranak menua nya

0

KAPIT: Sapit Menteri Pemansang Menua Pesisir enggau Kandang Menua (KKLW), Datuk Alexander Nanta Linggi pemansang projek jalai alun ke nyauh 80.5 km ari Kapit/Song/Kanowit diatu nyauka manggai 50 peratus.

“Pemansang projek jalai alun ari Kapit/Song/Kanowit diatu nyauka tembu manggai ba 50 peratus. Pengawa ngaga jalai engagu jematan ke meraka Sungai Kanowit ke nyauh 2.6 km diatu benung dibuka tinda, tang Jalai ari Poi/Nanga Ngungun ke nyauh urung 15.5 km diatu benung digaga. Ungkup (seksyen B) Jalai Nanga Ngemah/Nanga Temalat ke mungkur penyauh 9.6 km mega benung dibuka tinda lalu Jalai ari Song/Sipan/SK Temalat ke mungkur penyauh (7.5km) benung digaga diatu”, pia ku iya.

“Jalai Kapit/Sungai Yong ke ari baruh Fasa 1 (Seksyen C) ke mungkur penyauh 1.9 km udah tembu digaga, lalu ungkup Fasa 2, iya nya projek ngaga jalai ari Kapit/Sungai Yong ke mungkur penyauh 10.3 km benung digaga. Diatu kontriktor deka ngaga Jematan Katibas Bridge ari baruh Pakej 1 Seksyen C Fasa 3 Jalai Song/Sungai Yong ke mungkur penyauh 5.4 km, pia ku Nanta lebuh ke dikerandau pengarang berita pengudah Pengerami Nasih Tanah Jalai Song/Sungai Yong (Seksyen C-5/3) Fasa 3, Kapit Sarawak ari baruh Fasa 1 (Ch.0+000 nyentuk ke Ch.5+475) nyengkaum Jematan Katibas empai lama ke udah”, pia ku iya.

Alexander ke mega MP Kapit sekeda ejensi perintah meri kerejasama ke penuh ngambika projek ngaga jalai nya ulih mujur dipejalai ba timpuh ti udah ditetapka.

“Ukai pekara ke manah enti sema jalai nya enda mujur tembu digaga nitihka timpuh ti udah ditetapka. Nya alai kitai anang enda begempung ngambika projek nya mujur ditembuka. Pengawa ngaga jematan ke meraka Sungai Katibas udah diberi ngagai kontriktor, lalu aku arapka jematan tu ulih ditembuka enggau manah sereta lengkas,” ku iya.

Projek ngaga jalai nya enti udah tembu ila, ukai semina ngemudahka pejalai ari sebengkah kandang endur ngagai endur bukai baka ari Kapit ke Sibu, tang mega meri penguntung ke besai nyengkaum ngeninggika rega tanah sereta ulih dikemansang dikena nyungkak tikas ekonomi.

Ku iya, ba aum kabinet ke udah diatur empai lama, iya berunding deka ngangauka Dato Seri Mohd Najib Tun Razak nemuai ngagai sitak Parlimen Kapit taun baru, ngambika nyadi orang keterubah endar meda pemansang projek ke diberi iya ungkup Kapit pengudah sida menang ba Pengawa Bepilih Besai (2011). RM400 miliun udah diungkup kena ngaga jalai, Palan Meresi Ai baru Kapit, projek nyambung karan, Projek Bantu Rumah, penyikap palan penyangkai perau Kapit, projek ngaga tekad penagang ampuh bah di Song enggau Kapit, jalai alun di ulu Katibas, bekal ai ngagai menua pesisir enggau mayuh agi utai bukai.

Musyati Sdn. Bhd, konteriktor ke udah dikearap ngaga Jematan Katibas ke panjai 5.4 km ngena ungkus RM71.5 miliun. Projek nya berengkah digaga kena 8 September 2014 sereta disadang tembu digaga kena 7 March 2017.

Jematan Sungai Katibas digaga nyadika penyambung ngagai projek jalai Kapit-Song sereta sekeda jalai bukai ke sama bela dipejalaika konteriktor nya.

Ngambi projek nya mujur dipejalaika, dua bengkah pengawa Iban miring udah dipejalaika ba palan ke deka endur ngaga jematan ngambika perambu ngaga jematan Sungai Katibas diberekat.

Sama bela bisi ngulu pengerami nya Kaban Kunsil Nengeri sitak Katibas, Datuk Ambrose Blikau Enturan, sekreteri politik Kepala Menteri Sarawak, Jefferson Jamit Unyat, Menija Kandang Menua Tengah ari Opis Kereja Raya, John Aten, Kapit Residen, Fedrick John George, DO Kapit, Elvis Didit, DO Song, Jackline Bt August, Sekretari Opis Kaunsil Pelilih Mit Kapit, Yong Ing Chu, bala ketuai opis perintah sereta bala ketuai raban bansa enggau urung 300 iku bala temuai bukai.