Lumbung niang Kanang deka tembu sebedau Hari Easter 2015: Jabu

0

KUCHING: Perintah Menua udah mutuska deka ngaga pendam niang Temenggung Datuk Kanang anak Langkau ba Pendam Pengingat Bujang Berani di Jalai Budaya ditu, sebedau Hari Easter 2015.

Sapit Kepala Menteri Datuk Patinggi Tan Sri Alfred Jabu madah Perintah udah mutuska deka mantu ruang bilik niang Kanang nyemin pendam maya nya (Hari Easter 2015) baka ke udah disebut iya (Jabu) enggau Kepala Menteri Datuk Patinggi Tan Sri Adenan Satem, kemari.

“Maya ke manah nyemin pendam iya nya sebedau Hari Easter 2015 laban ba pengarap orang Keristin, maya nya maya ke berat beserimbai enggau pengangkat Tuhan Jesus ari pemati.

Nya alai, pendam nya deka tembu disemin lalu di komision sebedau Hari Easter 2015,” ku Jabu madah ba aum media di Hangar Hornbill Skyways sebedau angkat ke Miri, kemari.

Iya mega madah, Perintah deka mantu balu niang Datin Brawang Chunggot nitihka pematut laban iya udah madah sebana diri ngagai  perintah.

Kelimpah ari nya, iya mega madah, Perintah Menua mega deka bekerejasama enggau opis veteran soldadu menua tu (JHEV) minta lis pendam veteran bala Bujang Berani endur sida iya ditumbak.

“Dedini endur pendam Bujang Berani di serata menua tu, kitai minta JHEV meri penerang ngagai Perintah Menua nitihka protocol sida  empu, laban rayat sereta Perintah Menua bebasaka Bujang Berani kitai.

Perintah deka ngaga batu pengingat ungkup semua Bujang Berani, lalu deka nanya sida sebilik sebedau batu nya digaga. Nya kebuah, berat endar ba JHEV meri lis ngagai Perintah ba sentang pekara nya laban Perintah deka meri basa ke sebaka ngagai sida nya, enda ngira sida nya polis tauka soldadu, tang kitai ngelala pemerani sida maya nyaga menua kitai,” ku iya.

Jabu nandu, bakani ku basa Perintah sereta rayat ba niang Panglima Rentap kelia, baka nya mega basa ti sama deka diberi ngagai bala Bujang Berani kitai, lalu barang adat Iban ti deka dikena, sama deka dikena, ku Jabu.

“Pendam niang Kanang deka digaga enggau manah, lalu leka panjung ‘Agi Idup, Agi Ngelaban’ deka ditulis ba batu pengingat dia,” ku iya seraya madah, pendam niang Kanang agi meruan ba endur ke suba baka ke udah disetuju sida sebilik lalu enda deka dipindah.

Lalu baka nya mega, basa ke sebaka deka diberi ngagai penerima midul ‘George Cross’ ari Malaysia baka Awang anak Raweng enggau sekeda penerima midul Pingat Gagah Berani (PGB) enggau Seri Pahlawan Gagah Berani (SP) ari Sarawak.

Ngenang jaku Awang anak Raweng ke madahka diri jarang dikangau maya nyambut Hari Malaysia tauka sebarang pengerami besai menua bukai, ku Jabu:

“Perintah bebasaka Bujang berani kitai. Ngelama tu, enti bisi sebarang pengawa ke bisi kena kelaung Perintah, kami deka ngemetulka nya. Taja pia, penerima bintang berani bisi tusun sereta atur iya empu.

Enti sida iya kala gawa nyadi soldadu British kelia, sida bisi tusun atur diri sereta pemeri tauka elawin mega nitihka pematut sida empu.

Taja pia, kami sanggup berandau enggau Awang anak Raweng ba sentang elawin iya ari Perintah Menua,” ku iya.

Sebedau tu (ensanus) anak lelaki niang Kanang, Koperal Langgi Kanang, 33, bisi madahka diri enda lantang ati ketegal pendam apai iya di Tugu Pengingat Bujang Berani di Jalai Budaya lalu bedau dikemanah maya iya ngabas pendam niang apai iya nyerumba ‘All Soul’s Day’ kena 2 November tu tadi.

Berindik ari nya, Langgi madah, enti Perintah enda ngemanahka pendam apai iya, sida menyadi berunding deka mai rangkah apai iya pulai ngagai Sri Aman lalu ditumbak di Pendam Keristin Sutong, baka ke kala dipinta niang apai iya empu suba.

Niang Kanang midang kena 3 Januari 2013 lebuh umur iya manggai 68 taun ba Sepital Besai Sarawak.

Iya ditumbak begulai enggau 21 iku rangkah Bujang Berani ba Pendam Pengingat Bujang Berani di Jalai Budaya ditu.

Dalam soldadu Malaysia, niang Kanang kala gawa enggau Royal Ranger Regimen sereta 8 Batallion Rengers Regimen bepangkat Sergeat Major kelimpah ari kala masuk nyadi Sarawak Rangers (sebengkah ari soldadau British), nyadi Iban Trekker kena 21 April 1962.

Pengudah nya, iya dipasuk ke dalam Ranger Malaysia lebuh Malaya begempung enggau Sabah sereta Sarawak ke lalu numbuhka gempung Malaysia kena 16 September 1963.

Niang ninggalka seiku balu, Brawang enggau enam iku anak.