Pengari rayat dipinta nerangka kebuah Sepital Sri Aman lama tepagang

0

KUCHING: DAP Pampang Sri Aman kemari madahka diri berasai asa endar ati enggau pengari rayat sitak Sri Aman laban ti enda ngansak pengawa ngaga projek Hospital Sri Aman ke lama udah tepagang.

Ketuai pampang nya, Leon Jimat Donald madahka mensia mayuh diatu betapi enggau pemar sereta gaya ke nyadi ba sepital nya diatu, ke alai pengereja pengawa ba sepital nya pan nyau berasai bansu betapi enggau pemar ninting hari.

“Pengereja pengawa dia nyau kelalu mayuh kereja sereta enda tetapika pemar ke nyadi ba sepital lama.Pengari  rayat ari Sri Aman baka ke nadai penyikar lalu nadai kelai sepital baru deka digaga, nya alai nama kebuah sida semina nejuka pekara tu ? Berapa lama agi rayat di Sri Aman  deka merinsa ?”

Leon, ke mega Mandal Chairman DAP mansutka penerang tu pengudah ngulu Komiti Pemansik Sepital Sri Aman kena Hari Dua tu tadi ke mansik penyilap tanggungpengawa ke nyadi ba niang Wong Siew Fah.

Iya disempulang balu Wong, Nia Ruku, ke minta bayar pampas ari Sepital Sri Aman (HUSA). Wong parai ba wad A&E ketegal penyilap pengereja pengawa ba sepital nya kena tengah malam 12 Jun.

Orang politik ari raban penyakal kala madahka projek ngaga sepital baru Sri Aman nya ‘sakit’ laban lalu enda berengkah digaga pengudah diberita dalam kandang tiga taun ke udah.

Projek ke beungkus RM200 miliun seiti ari projek ti diungkupka nengeri  Sarawak lebuh Menteri Besai, Datuk Seri Najib Tun Razak nemuai kitu dalam taun 2011.

Nitihka ripot ari media sebedau tu, projek nya mungkur Fasa I ke beungkus RM9 miliun lalu laluh nya ari baruh Fasa 2 ungkup pengawa nero pelin sereta ngaga begunan. Sepital baru nya beguna amat laban sepital lama ti ditumbuh dalam taun 1959 enda  tetapika mensia mayuh agi diatu.

Perintah ngetanka projek sereta madahka pengawa ti dipejalaika ba Fasa I mungkur pengawa nambun tanah, nyendiaka palan sereta  nganti tanah ba palan nya tegap dulu sebedau sida belabuh ngaga sepital baru nya.