Kitai (polis) anang ngereja pengawa baka remaung dalam zoo, terus jinak udah disuap enggau ruti
MIRI: Orang ke gawa nyadi kaban polis patut ngereja pengawa baka remaung kampung lalu ukai baka remaung ke ditupi dalam zoo iya nya terus jinak pengudah disuap enggau ruti.
“Polis remaung enda ngirup ai di parit, tang ngirup ai ba tuchung bukit iya nya ba pun penatai ai, pia mega kitai anang makai bangkai, bulu kitai seruran beresi, nya baru tau dikumbai polis remaung,” ku Kepala Polis Pelilih Miri, ACP Gan Tian Kee.
Iya mansutka jaku nya rambau pengawa begempuru ninting buluan renggat kedua taun tu ke diatur di padang kawat Indu Opis Polis Pelilih (IPD) Miri ditu pagi kemari.
Sama bisi datai Sapit iya, Superintenden Stanley Jonathan Ringgit enggau Kepala Pemansik Jenayah Pelilih (KBSJD) Miri DSP Nixon Joshua Ali.
Berebak enggau nya, Gan nangkan bala pemesai enggau kaban polis ke bukai anang mudah lemi ati tiap kali ninga jaku bantah tauka jaku jai ari mensia mayuh.
Kenu ku iya, baka ke ditemu kitai mensia mayuh endang besai pengandal ati ngagai kitai (polis), nya alai kitai patut ngamatka pekara ke udah dikeandalka sida.
“Nya alai, seagi kitai ngerasukka baju biru tu anang sesekali mudah lemi ati, kitai patut bejalaika tanggungpengawa ungkup mensia mayuh lalu anang ngibuhka jaku bantah sida ngagai kitai,” ku tandu iya.
Nangkan ke nya, Gan mega madah sepanjai timpuh ari Januari nyentuk demalam, IPD Miri mujur ngerikod Indeks Pemanah Prestasyen (KPI) seratus-peratus dalam ngurangka penyampau kes jenayah di Miri.
Kenu ku iya, KPI ngurangka indeks jenayah nya endang lima peratus lalu Miri mujur ngurangka penyampau kes jenayah 15 peratus, penyampau ti ngelui ari tagit.
Berindik ari nya, iya meri besai terima kasih ngagai semua kaban polis laban ke udah mandangka pengeransing bejalaika pengawa diri empu endur nyapai KPI seratus-peratus ninting bulan.
“Tambah mega kitai mujur mutarka sekeda kes besai ke nyadi di Miri baka Aspin Amut, 24, ke mujur diputar dalam timpuh 48 jam.
“Seiku lelaki ke baru pansut ari rumah jil terus ngerumpak sereta nguji masung indu, ba tiga iti kes ke digaga dalam timpuh dua hari lalu kitai udah mujur nangkap. Diatu iya udah dijil,” ku iya.
Udah nya, Gan mega bisi diberi basa ngelekatka tanda pangkat suh empat iku polis ke bulih pangkat Sarjan iya nya Sarjan Muhammad Nazri Alias, Sarjan Markus Juti Andrew, Sarjan Rabaha Daud enggau Sarjan Ramping Jimbai.
Nangkan nya, bisi mai 48 pemesai enggau polis ke bukai diberi Anugerah Pekerja Cemerlang (APC) sereta 15 iku ke bukai nerima surat tanda basa ari Pesuruhjaya Polis (PJP) Sarawak nyerumba pengawa sehari nya.