SRI AMAN: Pemanah sereta pemadas rumah panjai ke ngemeranka langkar ‘rumah panjai asal’ enggau ‘moden’ di nengeri tu seruran narit mayuh penatai raban temuai ari dalam enggau luar menua datai nemuai ngagai mayuh bengkah rumah panjai ke bisi di nengeri tu.
Menteri Muda Pengawa Berumah, Datuk Francis Harden Hollis madah, pemanah rumah panjai ke agi ngemeranka langkar rumah panjai asal di nengeri tu patut ditan ngambi enda punas laban nengah chara nya kitai ulih ngetanka pesaka asal ke chukup berega kemaya hari tu.
Ku iya, taja pan piak menteri pengawa berumah Sarawak bisi nyendiaka sebengkah agi pakej baru diungkupka ngagai rayat rumah panjai iya nya ‘Pakej Pinjaman Perumahan Rumah Panjang Mesra Rakyat’ pun taun tu tadi, tang pesaka asal enggau adat tradisional ke bisi dikembuan rumah panjai ke ngemeranka konsep rumah panjai asal patut didegika enggau naka penegut.
“Tajapan rumah panjai ke deka digaga tu begunaka ‘Pakej Rumah Panjang Mesra Rakyat’, tang kita patut ngentanka pemanah pelin enggau chura rumah panjai asal tu laban nya chukup berega ngagai kitai ke diau dirumah panjai.
“Kelimpah ari nya, raban temuai ari dalam enggau luar nengeri tu rindu nemuai ngagai mayuh bengkah rumah panjai di serata nengeri Sarawak.
“Sida rindu meda enggau semak pemanah ke bisi dikembuan sesebengkah rumah panjai lama taja pan mayuh rumah panjai kemaya hari tu dipeda udah chukup moden,” ku iya.
Harden ke mega Kaban Kunsil Nengeri (ADUN) Simanggang mansutka jaku nya beserimbai enggau Program Nemuai iya ngagai Rumah Abang Akun, Kampung Kedang, Sri Aman ditu, empai lama ke udah.
Ku tandu Harden, Pakej Pinjaman Perumahan Rumah Panjang Mesra Rakyat ke udah dikemendarka taun tu tadi sebengkah ari skim baru ke udah dikemendarka Opis Menteri Pengawa Berumah.
Perintah nengah Opis Pengawa Berumah meha udah ngemendarka ungkup belanja ke beungkus RM2 juta ngagai ‘Pilot Project’ ungkup Rumah Collin di Miri pun taun tu tadi.
Ku iya, pelin rumah panjai baru nengah konsep baru nya semina dikemendarka pemadu mimit 10 buah pintu sereta palan alai ngentak rumah panjai nya mega deka disukat sereta diberi kelai ke patut ke nandaka tetiap pintu ke bisi dalam rumah panjai nya.
“Ungkus dikena ngaga sepintu rumah dalam rumah panjai nya iya nya urung RM70,000 nyentuk ngagai RM100,000 ke disediakan Housing Development Corporation (HDC) ke mungkur tiga buah bilik tinduk, ruai, bilik temuai, dapur enggau jamban.
“Timpuh 25 taun udah ditetapka perintah ke alai pinjau dikena ngaga rumah tu dibayar pulai baru,” ku iya.
Nya alai, iya minta peranak rumah panjai di serata nengeri tu enda muai sereta ngelengkaka awak nya laban mayuh penguntung enggau penyenang deka dikembuan sida nengah skim nya.
Sama bisi datai ba program nya, Ketuai Indu Parti Rakyat Bersatu Sarawak (SUPP) Simanggang, Ling Siew Hung, Sapit Chairman Raban Nembiak SUPP Simanggang, Patrick Micheal Malajin, Kaunsilor Andar Suntai, Tuai Rumah Japing ari Kampung Nyakai sereta raban parti ke bukai.
Beserimbei enggau penemuai nya, Harden mega bisi nyuaka geran bantu perintah ke beungkus RM8,000 ngagai Komiti Pemansang enggau Pengelikun Genturung Pendiau (JKKK) Rumah Abang dikena sida bejalaika pengawa sepanjai taun.