Sunday, March 24

Gabriel menang lima anugerah nyerumba AMD 2014

0

NYADIKA PERANSANG: Artis Rock Dayak Pemadu Manah, Masterpiece nerima anugerah malam nya.

KUCHING: Anugerah Industri Muzik Dayak (AMD) 2014 ke diatur Gerempung Artis enggau Muzik Dayak (DAMA) kena malam Hari Enam tu tadi mandangka seiku penyanyi Iban Gabriel Fairuz Louis mujur menang nyau deka semua kategori ke bisi dipekitka.

Gabriel mujur nerima lima anugerah ba atur pengawa nya. Entara anugerah ke diterima iya nyengkaum Album Dayak Pemadu Manah, Lagu Iban Pemadu Manah, Artis Pop Dayak Pemadu Manah, Artis Balada Dayak Pemadu Manah enggau Artis Lelaki Dayak Pemadu Manah.

AMD mujur diatur ba Palan Aum Borneo Kuching (BCCK).

Lebuh ke ditanya pengudah anugerah nya, Gabriel meri besai terima kasih ke sukung semua peminat, penulis leka lagu, komposer, pemuzik sereta piak ke bekerejasama enggau iya.

Enti nadai bantu ari sida tu, iya enda muntang bulih anugerah ke chukup berega nya, pia ku iya.

“Aku meri besai terima kasih ngagai tim ke chukup ransing bejalaika pengawa sereta mantu ngemujurka karier aku.

“Genap iku raban pemerindang meseti ngembuan penyerakup ke manah enggau raban bukai baru kitai ulih mujur sereta diterima mayuh peminta,” ku iya.

Entara pemenang bukai ke bisi bulih anugerah iya nya raban The Crew ke mujur menang dua iti anugerah (Artis Baru Dayak Pemadu Manah enggau Artis Dayak Beraban), Ronney Bukong (Kulit Album Pemadu Manah), Calhiem Sawin (Video Muzik Dayak Pemadu Manah), Monica Elen (Artis Indu Dayak Pemadu Manah) Janang Ensiring/ Embat Lala (Lirik Iban Pemadu Manah), Masterpiece (Artis Dayak Rock Pemadu Manah), Norman Ading (Tiun Muzik Dayak Pemadu Manah) enggau Rannee Pat (Lagu Bidayuh Pemadu Manah).

Kelimpah ari 16 bengkah kategori ke dipekitka, tiga iti Anugerah Seumur Idup bisi diberi ngagai muzik Dayak dikena ngemasa sereta ngingatka pemujur industri muzik Dayak.

Penyanyi tebilang Iban Christopher Kelly, pemain Sape Kayan Henry Anyi Ajang enggau Crooner Veteran Bidayuh Mike Rantai mujur nerima anugerah nya lalu anugerah khas DAMA diberi ngagai seiku pemain Sape Iban Jerry Kamit dikena ngingatka pengeransing iya mantu ngemujurka sereta ngemansangka industri muzik Dayak.

Entara raban artis bukai ke bisi merindang beserimbai enggau AMD 2014 iya nya Masterpiece, Jerry Kamit, Mezzavoce, The Crew, Along Lopeng enggau Seventh Tribe AMD sereta mayuh agi ke bukai.

Menteri Muda di Opis Kepala Menteri (Pemansang Pengawa Dagang Bumiputera) Datuk Mohd Naroden Majais diberi tanggungpengawa bejadi atur pengawa nya.

Entara raban pemesai bukai ke bisi datai ngulu AMD 2014 iya nya Chairman DAMA ke mega Kaban Kunsil Nengeri (ADUN) Balai Ringin Snowdan Lawan, ADUN Sadong Jaya Aidel Lariwoo sereta Chairman Menijar AMD 2014 Brown Sang Lagan.

“Anugerah tu sebengkah ari chara dikena ngulihka sukung sereta narit ati mayuh peminat.

“Perintah nengeri Sarawak mega seruran deka ngiga jalai dikena ngemansang sereta mempromosyenka album arti Dayak,” ku iya lebuh ditanya ba awak pengarang berita malam nya.

Anugerah keterubah AMD udah mujur diatur ba taun 2008 suba sereta deka diatur dua kali setaun dikena nyukung sereta ngangkatka industri muzik Dayak.

KELAI BASA: Pemenang anugerah khas DAMA 2014 Jerry Kamit merindang mensia mayuh lebuh atur pengawa nya.