BINTULU: Munyi signal ke ingar sereta sebuah latop ke dikunchi tegut dalam sebuah bank ngemuntanka ulah pechuri ngambi barang nya enggau barang berega ke bukai pengudah ke mujur tama ke dalam sebuah bank di puak mengeri ditu tumu pagi kemari.
Nangkan ke nya, penchuri nya mega ngelarika diri nadai utai ulih dibai laban ke tekenyit ninga signal ke dipasang ba bank nya.
Seiku staf bank ke meresa bank nya tumu pagi kemari madahka, nengah rikod kamera televisyen (CCTV) ba bank nya ngenukuka pekara nya nyadi pukul 1.25 pagi kemari.
“Rikod dalam CCTV nya mega mandangka saspek betubuh mit, paga sereta nguna perengka tajam mechahka pintu bank laban endur iya tama.
“Saspek dipeda ngeluit pintu kacha bank nya lalu ngujungka pintu sepiak kanan bank nya tebuka ambis lalu diengkah iya ba lantai kaki lima bank nya, pintu sepiak bank nya mega bisi rimpak lalu nya ngemuntangka saspek tama ke dalam bank,” ku iya madah ditu kemari.
Taja pia, ku iya ulah saspek nya ngujungka signal ke dipasang dalam bank bemunyi, udah nya saspek bisi nguji ngambi sebuah laptop dalam bank nya tang meh enda ulih laban laptop nya udah dikunchi tegut.
“Barang bukai nadai dikachau saspek laban iya terus ngelarika diri, nyangka takit ninga munyi signal ke ingar dipasang dalam bank nya,” ku iya.
Iya madah, signal nya mega bisi disambung ngagai Indu Opis Polis Pelilih (IPD) Bintulu lalu raban polis ke nemu pekara nya terus ngesah palan penusah nyadi.
Nadai barang berega diripotka lenyau berindik ari penusah nya, lalu kes tu agi benung dipansik polis.
Iya madah, saspek ke tama bank nya pedis deka dikelala laban iya bekarung mua. Semina ulih dipeda mata enggau idung saspak aja.